الەم بويىنشا مۇناي مەن گاز بارلاۋ 70 جىلدىق مينيمۋمعا ازايدى

مۇناي باعاسىنىڭ تومەندەۋى الەم بويىنشا ءىرى مۇناي كومپانيالارىنىڭ شىعىندارىن ازايتۋىنا سەبەپ بولدى. ناتيجەسىندە بارلاۋ جۇمىستارى توقىراپ, 2016 جىلى سوڭعى 70 جىلداعى ەڭ تومەنگى دەڭگەيگە ءتۇستى. بۇل تۋرالى investing باسىلىمى جازادى. دەمەك, Exxon Mobil, Shell سەكىلدى كومپانيالار سارقىلعان كەن ورىندارىنىڭ ورنىن تولتىراتىن جەرلەردى تابۋدا قيىندىققا ۇشىراپ, 2020 جىلعا قاراي الەمدە قارا التىن تاپشىلىعى بەلەڭ  الادى دەگەن ءسوز. بارلانعان مۇناي مەن گاز قورى 2016 جىلى 6 ملرد باررەلدەن ءسال استى, دەدى نورۆەگيالىق Rystad Energy كونسالتينگتىك كومپانياسىنىڭ اعا ساراپشىسى سونا ملادا. بۇل تۇرعىدا بيىل نارىقتا ۇسىنىستىڭ كوپتىگىن تۋدىرعان سولتۇستىك امەريكاداعى تاقتاتاس مۇناي قورى دا ستاتيستيكادا ەسكەرىلدى. 2016 جىلى ءىرى كەن ورىندارىنداعى سوڭعى ون جىلدا اشىلعان سۇيىق كومىرسۋتەك قورى 2010 جىلعىمەن سالىستىرعاندا 90 پايىزعا ازايعان. "2016 جىلى مۇناي كەن ورىندارىن بارلاۋ جۇمىستارىنىڭ ازايۋى قىسقامەرزىمدى كەزەڭدە شيكىزات باعاسىنا اسەر ەتپەگەنىمەن, ۇزاقمەرزىمدى بولاشاقتا بۇل ءوز اسەرىن تيگىزەتىن بولادى", - دەيدى اعا ساراپشى. ونىڭ ايتۋىنشا, نارىقتاعى تاپشىلىق شامامەن ون جىلدان كەيىن ناقتى كورىنە باستايدى. دەگەنمەن, كەي كومپانيالار وسى ۋاقىتتا دا جاڭا كەن ورىندارىن تابا بىلگەن. Exxon كومپانياسى تاياۋدا گايان كەن ورنىندا 100-150 ملن باررەل مۇناي قورىن تاپسا, نورۆەگيالىق Statoil 80 ملن باررەل مۇناي قورى بار جاڭا كەن ورنىن اشتى. جالپى, 2016 جىلى الەمدىك مۇناي كومپانيالارى سالاعا قۇياتىن ينۆەستيتسياسىن 40 ملرد دوللارعا ازايتقان.