فيرۋزا ءشارىپوۆا الەم چەمپيونى اتاعى ءۇشىن باسەكەگە تۇسەدى

قازاقستاندىق كاسىپقوي بوكسشىسى فيرۋزا ءشارىپوۆا (2-1, 1 كو) بيىل كوكتەمدە الەم چەمپيونى اتاعىنا تالاسادى. بۇل تۋرالى ول AllFight.Ru پورتالىنا بەرگەن سۇحباتىندا ءمالىم ەتتى, دەپ حابارلايدى قازاقپارات. ونىڭ سوزىنە قاراعاندا, جەكپە-جەككە دايىندىق ماسكەۋدە بولادى. دەگەنمەن كەزدەسۋدىڭ وتەتىن كۇنى مەن قارسىلاستىڭ ەسىمى ءالى بەلگىسىز. «21 قاڭتاردا مەن الەم چەمپيونى اتاعى جولىنداعى كەزدەسۋگە دايىندالۋ ءۇشىن ماسكەۋگە اتتانامىن. جەكپە-جەك 2017 جىلى كوكتەمدە وتەدى دەپ جوسپارلانعان. مەن ءوزىمنىڭ ارمانداعان ماقساتىما جاقىن قالدىم - قازاقستاننان شىققان العاشقى الەم چەمپيون اتانعان بوكسشى قىز بولعىم كەلەدى. شارشى الاڭعا كىممەن شىقسام دا, ءوز كۇشىمە سەنىمدىمىن جانە جەڭۋگە دايىنمىن. مەنىڭ فورمام جاقسى دەڭگەيدە. وسى ۋاقىتقا دەيىن تارازدا جاتتىعىپ ءجۇردىم. سوندىقتان باستى جەكپە-جەك الدىندا ەتتى قىزدىرىپ الۋ ءۇشىن قازىردىڭ وزىندە ارالىق رەيتينگتىك جەكپە-جەككە بۇگىن شىعۋعا دا دايىنمىن», - دەدى فيرۋزا ءشارىپوۆا. ايتا كەتەيىك, فيرۋزا ءشارىپوۆا قازاقستاندا قىزدار اراسىنان شىققان العاشقى كاسىپقوي بوكسشى. ءوزىنىڭ سوڭعى كەزدەسۋىندە ول سەربيالىق ميلەنا ءماتوۆيچتى ءۇشىنشى راۋندتا نوكاۋدقا جىبەرگەن بولاتىن.