قازاقستان قوناقۇيلەرى شەتەلدىكتەردى ونلاين تىركەيدى

ەلىمىزدەگى قوناقۇيلەرگە توقتايتىن شەتەلدىك ازاماتتاردى ەندى ونلاين تىركەۋگە بولادى. قىزمەت كورسەتۋدىڭ جاڭا ءتۇرى كەلگەن قوناقتى بەس مينۋتتىڭ ىشىندە ەشقانداي كوشى-قون قىزمەتىنىڭ وكىلدەرىنسىز قوناقۇيگە تىركەي الادى, - دەپ حابارلايدى Tengrinews.kz. ايتا كەتەيىك, بۇل جۇيە ەلىمىزدەگى بارلىق قوناقۇيگە مىندەتتەلەدى. "قوناقتاردى ونلاين تىركەۋ جۇيەسى بارلىق ەلدە بار. سوندىقتان ءبىز قازىرگى ۋاقىتتا ارىپتەستەرىمىزبەن جانە باسقا ورگاندارداعى قىزمەتكەرلەرمەن بىرىگە وتىرىپ, ەلەكتروندىق ۇكىمەت پورتالى ارقىلى ونلاين تارتىپتە تىركەۋدى ەنگىزدىك", - دەدى قر ءىىم كوشى-قون پوليتسيا دەپارتامەنتى باسشىسىنىڭ ورىنباسارى ەركىن بايباتچين. ونىڭ ايتۋىنشا, شەتەل ازاماتتارىن قوناقۇيگە تىركەۋ قىزمەتى تەگىن بولادى. قوناق تىركەلگەن سوڭ وعان ەلەكتروندىق نۇسقاداعى قاعاز بەرىلەدى, ياعني, شەتەل ازاماتى ونى باسىپ شىعارىپ, پاسپورتىنا تىركەپ قويادى. قر ءىىم سىرتقى كوشى-قون باسقارما باسشىسى نۇرعالي ريستانوۆتىڭ ايتۋىنشا, قازاقستانداعى بارلىق قوناقۇي شەتەل ازاماتتارىن ەلەكتروندى پورتال ارقىلى تىركەۋى كەرەك. "بۇل ەرەجەلەردى ورىنداماعان قوناقۇيلەرگە قانداي شارالاردى قولداناتىنىمىزدى ءالى شەشپەدىك. جاقىندا ويلاستىرىپ, شەتەلدىك ازاماتتاردى تىركەمەگەن قوناقۇيلەرگە قانداي جاۋاپكەرشىلىكتىڭ جۇكتەلەتىنىن حابارلايمىز", - دەدى نۇرعالي ريستانوۆ.