"استانا-زاششيتا" پويىزىنا "اباي جولى" اتاۋى بەرىلدى

"استانا-زاششيتا" باعىتىمەن قاتىنايتىن جۇردەك پويىزعا "اباي جولى" اتاۋى بەرىلدى, - دەپ حابارلادى "جولاۋشىلار تاسىمالى" اق ءباسپاسوز قىزمەتى. مۇنداي شەشىمگە شىعىس قازاقستان وبلىسى سەمەي قالاسى زيالى قاۋىمى وكىلدەرىنىڭ ۇسىنىسى نەگىز بولعانى ايتىلادى. "بيىل مۇحتار اۋەزوۆتىڭ دۇنيەگە كەلگەنىنە 120 جىل تولادى. بۇل - ۇلى جازۋشىنىڭ ادەبي مۇراسىن ناسيحاتتاۋداعى ناقتى قادام. ءبىزدىڭ ۇسىنىسىمىزعا قولداۋ بىلدىرگەن ۇلتتىق تاسىمالداۋشى كومپانيا باسشىلىعىنا العىس ايتامىز", - دەيدى ابايدىڭ "جيدەباي-ءبورىلى" مەملەكەتتىك مۇراجاي-قورىنىڭ ديرەكتورى بولات جۇنىسبەكوۆ. №67/68 "استانا-زاششيتا" جۇردەك جولاۋشىلار پويىزى وتاندىق "تۇلپار-تالگو" ۆاگوندارىمەن جاساقتالعان جانە كۇن سايىن جۇرەدى. جولداعى ۋاقىتى - 16 ساعات 30 مينۋت. ايتا كەتەيىك, قازىرگى كەزدە رەسپۋبليكالىق جانە مەملەكاتارالىق باعىتتار بويىنشا "الاتاۋ", "اكجايىك", "جەتىسۋ", "سارايشىق", "اقسۇڭقار" اتاۋلى پويىزدار قاتىنايدى.