فۋتبولدان قازاقستان جاستار قۇراماسى گراناتكين ءتۋرنيرىنىڭ فينالىنا شىقتى

فۋتبولدان قازاقستان جاستار قۇراماسى (18 جاسقا دەيىن) گراناتكين مەموريالى ءتۋرنيرىنىڭ فينالىنا شىقتى. بۇل تۋرالى vesti.kz حابارلادى. جارتىلاي فينالدا گرەكيا قۇراماسىمەن كەزدەسىپ, 2:1 ەسەبىمەن جەڭىسكە جەتتى. قازاقستان قۇراماسىنان ايدوس ورال قوس بىردەي دوپتىڭ اۆتورى اتاندى. الدىمەن, 18-مينۋتتا پەنالتيدەن ەسەپ اشسا, 49-مينۋتتا ەكىنشى گولىن سالدى. ال گرەكتەردەن شابۋىلشى گيورگوس تسوۆراس 58-مينۋتتا مەرگەندىگىمەن تانىلدى. ءبىر ايتا كەتەرلىگى جەرلەستەرىمىزدەن جارتىلاي قورعاۋشى ءجانالى پايرۋز 42-مينۋتتا ەكىنشى سارى قاعازىن الىپ, الاڭنان قۋىلدى. ال اقتىق سىندا رەسەي قۇراماسىمەن سىنعا تۇسپەك. گرەكيا ءوز كەزەگىندە ءۇشىنشى ورىن ءۇشىن سانكت-پەتەربۋرگپەن كەزدەسەدى. قازاقستان قۇراماسى بۇعان دەيىن ءتۋرنيردىڭ فينالىنا شىقپاعان. 2012 جىلى سوڭعى, 2014 جىلى 16-ورىندى يەلەنسە, 2015 جىلى 14 ۇجىمنىڭ ىشىندە 10-ورىنعا تۇراقتاعان. ايتا كەتەيىك, گراناتكين ءتۋرنيرى فيفا-نىڭ ءبىرىنشى ۆيتسە-پرەزيدەنتى ۆالەنتين گراناتكيننىڭ قۇرمەتىنە 1981 جىلدان ۇيىمداستىرىلىپ كەلەدى. وعان بارلىعى 16 كوماندا قاتىسادى.