2017 جىلدىڭ 16 قاڭتارىندا گونكونگ-ىستانبۇل باعىتىنداعى جۇك ۇشاعى بىشكەكتەگى باس اۋەجايدىڭ ماڭىنا قۇلاپ, اپاتتان 33 ادام قايتىس بولدى. دەگەنمەن, ۇشاقتاردىڭ ەلدى مەكەندەردىڭ ۇستىنە قۇلاۋى وتە سيرەك كەزدەسەتىن جاعداي. ويتكەنى, پيلوتتارعا اپاتتى جاعدايدا ۇشاقتى نەعۇرلىم ەلدى مەكەندەردەن الىس اكەتۋ ۇيرەتىلەدى, دەپ جازادى ۆۆس.
"اپاتتى جاعدايدا پيلوت ۇشاقتىڭ جولىن انىقتاپ, جاعدايدى تۇسىندىرەدى. ادەتتە ۋاقىت وتە از بولادى. سوعان قاراماستان, پيلوتتار نەعۇرلىم ادامدار از قونىستانعان جەرلەرگە قاراي باعىت الۋعا تىرىسادى", دەيدى Flight Global رەداكتورى گرەگ ۋولدرون.
مىسالى, 2009 جىلدىڭ قاڭتارىندا نيۋ-يورك اۋەجايىنان ۇشقان Airbus 320 ۇشاعىنىڭ قوزعالتقىشتارى قۇس سوعىلعاندىقتان ىستەن شىقتى. اۋەجايعا جەتە المايتىنىن تۇسىنگەن پيلوت ەلدى مەكەندەرگە قۇلاماس ءۇشىن ۇشاقتى گۋدزون وزەنىنە قوندىردى. ءسويتىپ, بورتتاعى 155 ادام مەن جەردەگى تۇرعىنداردىڭ ءومىرىن قۇتقارىپ قالدى.
2015 جىلدىڭ 30 شىلدەسىندە يندونەزيانىڭ اسكەري ۇشاعى سۋماترانىڭ سولتۇستىگىندەگى مەدان اۋەجايى ماڭىنداعى ەلدى مەكەنگە قۇلاپ, جەردەگى 17 ادام مەن بورتتاعىلاردىڭ كوپشىلىگى قايتىس بولدى.
2005 جىلى مەملەكەتتەگى پولونيا اۋەجايىنان ۇشقان Boeing 737 ۇشاعى دا ۇيلەردىڭ ۇستىنە قۇلاپ, 50 جەرگىلىكتى تۇرعىن مەن ۇشاقتاعى 100 ادام قازا تاپتى.
2012 جىلدىڭ قاراشا ايىندا كونگو رەسپۋبليكاسىنىڭ استاناسى براززاۆيلدە يليۋشين-76 جۇك ۇشاعى اۋەجايعا قوناتىن كەزدە اعاشقا سوعىلىپ, تۇرعىن ۇيلەردىڭ ۇستىنە قۇلادى. قايتىس بولعان 32 ادامنىڭ كوپشىلىگى جەردەگى تۇرعىندار ەدى. سونداي-اق 2011 جىلدىڭ ناۋرىز ايىندا وسى مەملەكەتتەگى پۋەنت-نۋار ەلدى مەكەنىنە قۇلاعان ۇشاق 14 ادامنىڭ ءومىرىن قيدى.
2012 جىلى ماۋسىمدا نيگەريادا Dana Air اۋە كومپانياسىنا تيەسىلى جولاۋشىلار ۇشاعى قوزعالتقىشتان شىققان اقاۋدىڭ كەسىرىنەن ەلدى مەكەنگە قۇلادى. اپاتتان 153 ادام قايتىس بولدى.
2008 جىلدىڭ 4 قاراشاسىندا مەكسيكا استاناسى مەحيكودا ەلدىڭ ىشكى ىستەر ءمينيسترى حۋان كاميلو موۋرينو مىنگەن ۇشاق قالانىڭ قارجى ورتالىعىنا قۇلاپ, جەردەگى 7 ادام قازا تاپتى.
اقش تاريحىنداعى ەڭ ءىرى ۇشاق اپاتتارىنىڭ بىرىندە 251 ادام قازا تاپقان بولاتىن. سىرتتان قاراعاندا بۇل لاڭكەستىككە ۇقساعانىمەن, زەرتتەۋ ناتيجەسىندە اپات پيلوتتىڭ قاتەلىگىنەن بولعانى انىقتالدى. سونىمەن قاتار 2001 جىلدىڭ قاراشا ايىندا نيۋ-يوركتەگى دجون كەننەدي اتىنداعى اۋەجايدان ۇشقان American Airlines اۋە كومپانياسىنىڭ Flight 587 ۇشاعى كۆينستەگى تۇرعىن ۇيلەردىڭ ۇستىنە قۇلاپ, اپات سوڭى ورتكە ۇلاسقان.
