اتىراۋ اۋماعىنان جاڭا قوقىس پوليگونى سالىنادى

اتىراۋ قالاسى اۋماعىنان جاڭا قوقىس پوليگونىن سالۋعا جەر ءبولىندى, - دەپ حابارلايدى قازاقپارات. اتىراۋدا قازىر قالانىڭ تازالىعىن ساقتاۋ ماقساتىندا ءۇش جۇزدەن استام جول جۇمىسشىلارى مەن 200 تەحنيكا جۇمىس جاساپ كەلەدى. تۇرعىنداردىڭ كۇندەلىكتى قاتتى تۇرمىستىق قالدىقتارىن قوقىس پوليگونىنا جەتكىزۋ, كوشەنى قاردان, جاڭبىر سۋىنان تازالاۋ جۇمىستارى «ارناۋلى اۆتوبازا» جشس مەكەمەسىنە جۇكتەلگەن. «ارناۋلى اۆتوبازا» جشس ديرەكتورى سامات تۇرنيازوۆتىڭ ايتۋىنشا, قالانىڭ تازالىعى وتكەن جىلدىڭ قىركۇيەك ايىنان باستاپ وبلىس اكىمدىگىنىڭ باستى نازارىندا. وبلىس اكىمدىگىنىڭ قولداۋىمەن 2016 جىلدىڭ كۇزىندە جۇمىسشىلاردىڭ ايلىق ەڭبەكاقىلارىنا 35 مىڭ تەڭگەدەن قوسىلىپ, قىزمەتكەرلەردىڭ سانى 180-نەن 320 ادامعا كوبەيتىلگەن. - قازىرگى تاڭدا اتىراۋ قالاسى مەن قالا اۋماعىنداعى ەلدى مەكەننىڭ كوشەلەرىندە 2600-دان استام قوقىس جاشىگى بار. ولاردى كۇنىنە 22 ارناۋلى كولىك جيناپ, قوقىس پوليگونىنا جەتكىزىپ وتىرادى. قالادان 5 شاقىرىم جەردە ورنالاسقان قوقىس پوليگونىنىڭ اۋماعى 35 گەكتار جەردى قۇرايدى. قىرىق جىلدان بەرى قالانىڭ كۇل-قوقىسى سول جەرگە شىعارىلىپ كەلەدى, - دەيدى سامات تۇرنيازوۆ. قازىرگى تاڭدا جاڭا قوقىس پوليگونىن سالۋ ءۇشىن ماحامبەت اۋدانى اۋماعىنان دا 50 گەكتار جەر تەلىمى ءبولىنىپ وتىر. باسشىنىڭ ايتۋىنشا, قالاعا ءالى 1000 قوقىس جاشىگى قاجەت. سونداي-اق, قالانى قاردان تازالاۋعا كۇرەكپەن جابدىقتالعان 10 اۆتوكولىك جانە تۇزدى توپىراق شاشاتىن, جولداردى قاردان تازالايتىن ارنايى تەحنيكالار بار.