ماقسات – تۇراقتى ەڭبەكپەن قامتۋ

بۇگىنگى كۇننىڭ وزەكتى ماسەلەلەرىنىڭ ءبىرى تۇرعىنداردىڭ جۇمىسپەن قامتىلۋىنا جاعداي تۋعىزۋ جانە كاسىپكەرلىكتىڭ كوكجيەگىن كوتەرۋ ەكەنى بەلگىلى. بۇل باعىتتا رەسپۋبليكامىزدا بۇعان دەيىن «جۇمىسپەن قامتۋدىڭ جول كارتاسى-2020» باعدارلاماسى بەلگىلەنىپ, وسى شەڭبەردە كوپتەگەن جوبالار جۇزەگە استى. اتالعان باعدارلاما ءالى دە ءوز جالعاسىن تاۋىپ كەلەدى. مۇندا ەڭ الدىمەن ۋاقىتشا جۇمىس ورىندارىن قۇرۋعا باسىمدىق بەرىلگەن بولاتىن. ۋاقىتشانىڭ اتى ۋاقىتشا. مەن بۇل جەردە ۋاقىتشا جۇمىس جاساپ ءجۇرمىن دەگەن وي ادامدارعا پسيحولوگيالىق تۇرعىدان قولايسىزداۋ اسەر ەتەدى. ويتكەنى, مۇنداي جاعدايدا ولار كوڭىلىن تۇبەگەيلى ورنىقتىرا المايدى. وسى ورايدا بيىلعى جىلدان باستاپ ەلىمىزدە تۇراقتى جۇمىس ورىندارىن اشۋعا باسا كوڭىل ءبولىنىپ وتىرعانى ۇلكەن مەرەي. رەسپۋبليكا ۇكىمەتىنىڭ 2016 جىلدىڭ 29 جەلتوقسانى كۇنى قابىلداعان «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسى» وسى ماقساتتى كوزدەيدى. ورال گاز, مۇناي جانە سالالىق تەحنولوگيالار كوللەدجىندە وسى ماسەلەگە وراي ارنايى كەڭەس وتكىزىلدى. وعان باعدارلامانىڭ ءبىرىنشى باعىتىنا تولىق ءارى جان-جاقتى تۇسىنىك بەرۋ جانە سالا ماماندارىنىڭ ساۋالدارىنا جاۋاپتار قايتارۋ ءۇشىن ءبىلىم جانە عىلىم مينيسترلىگى تەحنيكالىق جانە كاسىپتىك ءبىلىم دەپارتامەنتىنىڭ باس ساراپشىسى باقىتجان بيەكوۆا ارنايى كەلىپتى. ونىڭ ايتۋىنشا, ناتيجەلى جۇمىسپەن قامتۋعا جانە جاپپاي كاسىپكەرلىكتى دامىتۋعا جاڭا باعدارلامانىڭ تيگىزەتىن سەپتىگى مول. سونىمەن بىرگە, ونىڭ اياسىندا تابىسى تومەن قازاقستاندىقتارعا جەكە ءىسى مەن كاسىبىن اشۋ ءۇشىن مەملەكەتتىك قولداۋلار جاسالادى. جاڭا باعدارلاما رەسپۋبليكا پرەزيدەنتى ن.نازارباەۆتىڭ تاپسىرماسىنا ساي ازىرلەنگەن دەپ اتاپ كورسەتتى باس ساراپشى. ونىڭ باستى ماقساتى – ءوز اتاۋىنان كورىنىپ تۇرعانداي, ازاماتتاردى ناتيجەلى جۇمىسپەن قامتۋعا جانە تۇرعىنداردىڭ تابىستارىن تولىقتىرۋعا جاعداي تۋعىزۋ. اتالعان جوبا اسىرەسە اۋىل تۇرعىندارىنىڭ ەلەۋلى بولىگىنە كاسىپكەرلىكتىڭ العاشقى قادامدارىن ورنىقتىرۋعا سونداي-اق, بيزنەس باستامالارىن جۇزەگە اسىرۋعا مۇمكىندىك بەرەدى. سونىمەن بىرگە, جاستاردىڭ نارىق سۇرانىسىنا ساي ماماندىقتاردى تەگىن يگەرۋىنە دە جول اشادى, دەدى ول ودان ءارى. ءتۇيىپ ايتقاندا, ناتيجەلى جۇ­مىسپەن قامتۋ جانە جاپپاي كاسىپ­كەرلىكتى دامىتۋ باعدارلاماسى با­تىسقازاقستاندىقتارعا قانداي شا­پا­عاتىن تيگىزەدى دەگەن ويعا تابان تىرەگىمىز كەلەدى. بۇل رەتتە الدىن الا ازىرلەنگەن كەيبىر دەرەكتەردى وقىرماندار نازارىنا بەرە كەتكەننىڭ ارتىقشىلىعى بولا قويماس. ياعني, وعان ورال ءوڭىرى بويىنشا بەس جىل ىشىندە 4000 ادام تارتىلماق. مۇنىڭ ءوزى ءار جىل سايىن 800 ادام تۇراقتى جۇمىس ورنىن تابادى دەگەن ءسوز. سونىمەن بىرگە جاڭا باعدارلاما ەل ازاماتتارىنىڭ, سونىڭ ىشىندە, ولاردىڭ كەيىنگى تولقىنى مەن جاستاردىڭ قىسقا مەرزىمدى كاسىپتىك ءبىلىم الۋىنا دا نەگىز قالايدى. سوعان سايكەس اقجايىق ايماعىنان 5000-عا جۋىق ادام اتالعان كۋرسقا قابىلدانادى دەپ كۇتىلۋدە. بۇعان ءبىرىنشى كەزەكتە ۇبت تاپسىرا الماعان مەكتەپ تۇلەكتەرى مەن تۇرمىسى تومەن وتباسىنان شىققان بالالاردى وقىتۋ كوزدەلگەن. ولارعا ءبىرىنشى جانە ەكىنشى ماماندىقتى تەگىن الىپ شىعۋ مۇمكىندىگى بەرىلمەك. تەمىر قۇسايىن, «ەگەمەن قازاقستان» ورال