ساداقا «مەيرام» با؟

قازاق – تويشىل حالىق. ءان مەن كۇيدى اقتارىپ, «تۋعاندا دۇنيە ەسىگىن اشادى ولەڭ, ولەڭمەن جەر قوينىنا كىرەر دەنەڭ» دەگەندەي, سالدەي مەرەكەنى كول-كوسىر قۋانىش ەتىپ اتاپ وتەتىنى بار. الەم ەلدەرىن تىقسىرىپ, تارىنىڭ قاۋىزىنا سىيعىزا كەۋدەسىن كەرگەن داعدارىس دەگەنىڭنىڭ ءوزى قازەكەمە كەلگەندە ەسىكتەن سىعالاپ «قايدان كەلدىمگە؟» تۇسەتىندەي... قازاقستانعا العاشقى بولىپ كەل­گەن شەتەلدىك كومپانيالاردىڭ ءبىرى «تەڭىز­شەۆ­رويلدا» قىزمەت ەتەتىن ءبىر امەري­كالىق «جەر بەتىنەن قازاقتاي باۋىرمال حالىق­تى كورمەپپىن. بۇلار جۇرت ءۇشىن جۇمىس جاسايدى, ءبىرىنىڭ بالاسىن ءبىرى ۇيلەندىرىپ, ءبىرىنىڭ تويىن ءبىرى جاساپ بەرەدى. جالاقىسىن العان بويدا اعايىن-تۋىس, دوس-جاراننىڭ تويىنا اپارادى, ال ءوز ۇيىندە توي بولسا, ولار قايتا جيناپ اكەلەدى» دەگەن ەكەن. ءيا, تاعدىر قازاقتى تويدان ايىرماسىن! قازىر كەز كەلگەن توي-مەرەكەنى, بالانىڭ تۇساۋكەسەرى مەن سۇندەت تويىنان باستاپ, ءارتۇرلى مەرەيتويلاردى, كەلىن ءتۇسىرىپ, قىز ۇزاتۋدى, كەلىننىڭ بەتاشارىن شاڭىراقتا, وتباسىندا ەمەس, مەيرامحانالاردا جاساۋ ادەتكە اينالدى. «شاڭىراقتان ۇلى نە بار؟ كەلىننىڭ بەتىن شاڭىراقتا اشقان دۇرىس قوي» دەگەن پىكىرلەر دە ايتىلىپ قالىپ جاتىر. دۇرىس تا شىعار, بىراق... مەيرامحانالاردا جاسالاتىن تەك توي عانا ما؟ قايتقان ادامنىڭ ءۇشى, جەتىسى, قىرقى مەن ءجۇزى, جىلى, ەسكە الۋ ساداقالارىن دا مەي­رامحانالاردا اتاپ وتەدى, قۇددى كىسى­نىڭ قايتىس بولۋىن مەيرام ەتكەندەي... ال ەرتەسىنە كۇنى كەشە قۇران وقىلىپ, ءولى رۋحىن ريزالايمىز دەگەن قاسيەتتى ورىندا اراق-شاراپ ءىشىلىپ, داڭعازا اۋەنگە جۇلقىنا بيلەپ, ءتىپتى, نەبىر سوراقى قىلىقتارمەن جۇرت نازارىن وزىنە اۋدارعان القىن-جۇلقىن بيلەر ۇيىمداستىرىلىپ توي بولىپ جاتادى. وسىندايدا ولىلەر رۋحىنا باعىشتالار ساداقالارمەن وزگە دە ەسكە الۋ شارالارىن ۇيىمداستىرۋ ءۇشىن ارنايى حاتىمحانالار نەمەسە باسقا ءبىر ورىندار بولسا جانە مۇنداي ورىندار مەشىت جاندارىنان اشىلسا, مەشىتتى قارجىلاندىرۋعا سەبى تيەر مە ەدى دەگەن وي كەلەدى. گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى