«قازاق ارتەگى» كوبەيە تۇسسە

ۇرپاق تاربيەسىندە ۇستازدىڭ ورنى بولەك قوي. كەيدە اتا-انا بەرە الماعان ءتالىم مەن تاربيەنى مۇعالىم ۇيرەتىپ جاتادى. جاقسى مۇعالىمگە قاراپ بوي تۇزەۋدى ءار بالا وزىنە پارىز سانايدى. مەن مۇنى ءوز بالالارىمنىڭ ءوسۋ جولى­نان كورىپ-ءبىلىپ ءجۇر­مىن. ءبىز­دىڭ بالا كەزىمىزدە وقۋ­شى­لار لاگەرگە ءجيى بارىپ تۇرا­تىن. قازاق بالالارىمەن ءبىر­گە ءوس­تىك. سودان دا بولار, مەملە­كەت­­تىك ءتىلدى ءوزىم دە, بالالارىم دا جاقسى بىلەدى. تالعار قالا­سىن­­داعى جامبىل اتىنداعى №6 مەك­­تەپ­تىڭ 10-سىنىبىندا وقيتىن قىزىم انگەلينا گايۆورونسكايا كوك­شەتاۋدىڭ بۋرابايىنداعى «بال­داۋرەن» وقۋ-ساۋىقتىرۋ كەشە­نىندە جيىرما كۇن بولىپ قايتتى. جاقسى دوستار تاپقانىن, ءبىلىمدى ۇستازداردان ساباق العانىن, مەيىرىمدى تاربيەشىلەردەن ۇلگى ۇيرەنگەنىن ۇزبەي ايتىپ ءجۇر. ءار ءپان مۇعالىمى وقۋشىعا قاجەت­تىڭ ءبارىن جاساپتى. تاقى­رىپ­تار بويىنشا وتكەن ساباق­تار­دىڭ تىزبەسىن, العان باعاسىن, مىنەزدەمەسىن قولىنا ۇستاتىپتى. مەن سونىڭ بارىنە قاراپ وتىرىپ ەلىمىزدەگى بىردەن-ءبىر كەشەننىڭ وسىنداي جۇمىسىنا ريزا بولۋمەن قاتار, العىسىمدى ايتىپ حات جىبەردىم. بۋرابايدىڭ اسەم تابيعاتىنىڭ اياسىندا وتكەن ساباق, ۇيرەنگەن تاربيە بالامنىڭ ماڭگى ەسىندە قالاتىن سەكىلدى. مەن بۇرىن كوكشەتاۋدا «قازاق ارتەگى» جۇمىس ىستەيدى دەگەن­دى ەستيتىنمىن. سويتسەم, ول «بال­داۋرەن» وقۋ-ساۋىقتىرۋ كەشەنى ­ەكەن. ءبىزدىڭ بالا كەزىمىزدە قىرىمداعى ارتەككە بارۋ ءار وقۋشىنىڭ ارمانى سانالا­تىن. ەندى مىنە, تاۋەلسىز ەلىمىز­دە دە سونداي «ارتەك» جۇمىس ءىس­تەپ جاتىر ەكەن. وسى ارادا, اي­تار ءبىر ۇسىنىس-پىكىرىم – «بال­داۋرەن» وقۋ-ساۋىقتىرۋ كەشەنى­نىڭ بولىمشەلەرىن بارلىق ءوڭىر­لەردەن اشىپ, سونىڭ بارىندە دە وقۋشىلار دەمالا ءجۇرىپ ءبىلىمىن جالعاستىراتىن مەكتەپتەر ۇيىمداستىرسا, نۇر ۇستىنە نۇر بولار ەدى. ءتىپتى, سول بولىمشەلەردە جاقسى جاعىنان كوزگە تۇسكەن وقۋشىلاردى «بالداۋرەنگە» جىبەرىپ جاتسا, وقۋشىلاردىڭ مارتەبەسى كوتەرىلەر ەدى. ونى «قازاق ارتەگى» دەپ اتاسى دا ەش ارتىقتىعى جوق سەكىلدى. بۇلاي دەۋىمە سەبەپ, ەلىمىزدەگى بارلىق وقۋ­شىلاردى «بالداۋرەنگە» جىبەرۋ مۇمكىن ەمەس ەكەنى بەلگىلى. ونىڭ ۇستىنە, بۋرابايعا بارىپ قايتۋعا كەز كەلگەن وقۋشىنىڭ جاعدايى دا كوتەرە بەرمەيدى. ءبىر سوزبەن ايتقاندا, مەكتەپتەگى ۇستازدار سەكىلدى بالالار دەمالىپ, وقيتىن كەشەندەگى مۇعالىمدەر مەن تاربيەشىلەرگە دە ءىلتيپات ءبىلدىرۋ كەرەك. ونىڭ ۇستىنە مەن «ەگەمەن قازاقستان» گازەتىن ۇزبەي وقيتىنداردىڭ قاتارىندامىن. «ءبىلىم», «ءتالىم» بولىمدەرىندە ۇستازدار تۋرالى كوپ جازىلىپ ءجۇر. مەن دە باس باسىلىم ارقىلى ۇس­تاز­دار قاۋىمىنا العىسىمدى ءبىل­دىرۋدى مىندەت سانادىم. تاتيانا گلادكيح الماتى وبلىسى, تالعار قالاسى