«داڭق» وردەنىمەن ءتورت رەت ماراپاتتالعان

سولتۇستىك قازاقستان وبلى­سىنا ارنالعان ەن­تسيكلو­پەديا­لاردىڭ ءبا­رىندە جامبىل اۋدا­نىنداعى, جالتىرشا اۋىلىنىڭ تۋماسى امىرەش ءدار­مەنوۆتىڭ «داڭق» ور­دەنىنىڭ تولىق يەگەرى ەكەنى تايعا تاڭبا باسقانداي انىق جازىلعان. باتىردىڭ ءومىر جولىنا ۇڭىلەتىن بولساق, فاشيستەرگە قارسى قيان-كەسكى شاي­قاستاردا 139-اتقىشتار ديۆيزيا­سىنىڭ 609-اتقىشتار پولكىنىڭ بارلاۋشىسى, كەيىن ءبو­لىم­شە كومانديرى بولعان ول 1944 جىلى 22 ساۋىردە ال­عاش رەت ءىىى ءدا­رە­جە­لى «داڭق» وردەنىمەن (№509751) ماراپاتتالعان. سول جىلدىڭ 28 ماۋسىمىن­دا م­و­گيلەۆ قالاسىن جاۋدان ازات ەتۋ كەزىندە فاشيستەردىڭ كوزىن جويى­پ, تۇتقىنعا العانى ءۇشىن ءىى دارەجەلى «داڭق» وردەنىن كەۋ­دەگە تاققان. ال 10 تامىزدا قا­ھارماندىق ەرلىگى ءۇشىن ەكىن­شى مارتە ءىى دارەجەلى «داڭق» وردەنىنە (№134493) يە بولعان. 1945 جىلى 24-25 ناۋرىز كۇندەرى دانتسيگ (گدانسك, پولشا) قالا­سىنىڭ تۇبىندە جاۋ شەبىنە ەنتەلەي ەنىپ, تانككە قارسى قولدانىلاتىن گراناتامەن ءۇش پۋلەمەت ۇياسىن تالقانداپتى. جاۋدى وك­شەلەي قۋا وتىرىپ, قاراماعىنداعى جاۋىنگەرلەرمەن ون بەس جاۋ سولداتىن تۇتقىنعا العان. وسى ەرلىگى ءۇشىن ءى دارەجەلى «داڭق» وردەنىمەن (№1285) ماراپاتتالعان. ارينە, اينالاسى ءبىر جىل­دىڭ ىشىندە امىرەش ءدار­مەنوۆتىڭ «داڭق» وردەنىمەن ءتورت رەت ماراپاتتالۋى قازاق وعلانىنىڭ ەرلىگىن كورسەتسە كەرەك. باسقالاي ايتقاندا, «داڭق» وردەنىنىڭ تولىق كاۆالەرى بولۋمەن قاتار, وردەننىڭ ءىى دارەجەسىمەن ەكى رەت ماراپاتتالعان. ءسوز اراسىندا «داڭق» وردەنى كسرو جوعارعى كەڭەسى تورالقاسىنىڭ 1943 جىلعى 8 قاراشاداعى جار­لىعى­مەن بە­كى­تىلىپ, ءۇش دارە­جەسىمەن ما­را­پاتتال­عاندار كەڭەس وداعىنىڭ باتىرى اتاعىنا تە­ڭەستىرىل­گە­نىن ايتا كەتكەن ءجون. ياعني, امىرەش ءدار­مەنوۆتى باتىرلار ساناتىنا قوسۋعا ابدەن بولادى. ەكىن­شى دۇنيە­جۇزىلىك سوعىستا «داڭق» وردەنىن ءبىر مايدانگەر بەس رەت, 86 جاۋىنگەر ءتورت مارتە الىپتى. بەيبىت ومىردەگى عۇمى­رىن كەڭ­شاردىڭ مالىن باعۋمەن وتكىزگەن باتىر اتامىزدىڭ دۇنيە­دەن وتكەنىن بيلىكتەگىلەر بىلمەي دە قالعان بولاتىن. اراعا ءبىر ايداي ۋاقىت سالىپ, سيىردىڭ تىلىندەي عانا كوڭىل ايتۋمەن شەكتەلگەن. بۇگىنگە دەيىن ەسكە­رۋسىز قالىپ كەلە جات­قان جەرلەسىمىزدى كەش تە بولسا ۇلىقتاپ, ءبىر كوشەگە اتىن بەرە­تىن كەز جەتكەنى انىق. باسقا دا قۇرمەت كورسەتىلىپ جاتسا, ارتىقتىق ەتپەس ەدى. ءومىر ەسقالي, «ەگەمەن قازاقستان» سولتۇستىك قازاقستان وبلىسى