دينانىڭ دومبىراسى

دومبىرانى 1939 جىلى شەبەر ارىستان ەرمەكوۆ جاساعان. اتاقتى كۇيشى ءوزى تۇتىنعان بۇل قۇندى جادىگەردى كەيىننەن مۋزىكاتانۋشى بولات سارىباەۆقا سىيعا تارتادى. قازىر ۇلتتىق مۋزەيدىڭ قازاقستان تاريحى زالىندا تۇر. 9 جاسىندا «دومبىراشى قىز» اتانعان دينا نۇرپەيىسوۆا جاسى 90-نان اسىپ قايتىس بولعان. كۇيشى-كومپوزيتور, قازاق مۋزىكا مادەنيەتىنىڭ اسا كورنەكتى قايراتكەرى, قازاق كسر حالىق ءارتيسى دينا نۇرپەيىسوۆا باتىس قازاقستان وبلىسىنىڭ جاڭاقالا اۋدانى­نا قاراستى بەكەتاي قۇمى دەگەن جەردە دۇنيەگە كەلگەن. «دينا 1870 جىلى ونەردە العاش تۇساۋىن كەسكەن ۇستازى قۇرمانعازى ساعىرباي ۇلىمەن كەز­دەسەدى. جاس تالانتتىڭ دومبىرادا ويناۋىن قاداعالاپ, باعىت-باع­دارىن بايقاعان ءداۋ­لەسكەر كۇيشى ودان بو­لا­شاقتا ۇلكەن ونەر يەسى شىعاتىندىعىنا كوزى جەتىپ, ءوزىنىڭ باتاسىن بەرگەن ەكەن. دينا نۇرپەيىسوۆانىڭ دومبىرادا ورىنداۋشىلىق ونەرىنە قايران قالعان كومپوزيتور احمەت جۇ­بانوۆ: «دينا ۇزىن دا سۇيرىكتەي ساۋساقتارىمەن دومبىرا پەرنەسىندە, ساعاعىندا نەبىر الشاق پەرنەلەر ارالىقتارىن ەشبىر مۇلتىكسىز الادى. سيمفونيا سازىنداي سيقىرلى اۋەن 62 تا­مىرىڭدى بويلاتا, شىمىرلاتا, بۋىرقانا نەبىر اسەرگە تۇسىرەدى» دەگەن ەكەن», دەيدى قازاقستان تاريحى ءبولىمىنىڭ عىلىمي قىزمەتكەرى عاليا اقپان­بەكوۆا. جەتپىستەن اسقان شا­عىن­دا دينا كەنجە­قىزى كۇيلەرىن نوتاعا ءتۇسىرىپ, كۇيتاباققا جاز­دىرىپ, 2 رەت وداق دەڭگەيىندەگى بايقاۋعا قاتىسقان. 1937 جىلى حالىق ونەرپازدارىنىڭ رەسپۋبليكالىق سايىسىندا ءبىرىنشى جۇلدە العان دينا نۇرپەيىسوۆا, 1939 جىلى ماسكەۋدە ۇي­ىمداستىرىلعان بۇكىل­وداقتىق ح­ا­لىق اسپاپتارى ورىن­داۋ­شىلارىنىڭ بايقاۋىندا, ال 1944 جىلى 83 جاسىندا ورتالىق ازيانىڭ بەس رەسپۋب­ليكاسى اراسىندا تاشكەنت قالاسىندا وتكەن ونەر دوداسىندا جۇلدەلى ورىندارعا قول جەتكىزگەنى تاريحتان بەلگىلى. ايگۇل سەيىلوۆا, «ەگەمەن قازاقستان» سۋرەتتى تۇسىرگەن ورىنباي بالمۇرات, «ەگەمەن قازاقستان»