ۋنيۆەرسيادا – ۇكىلى ۇمىتتەر بايگەسى

قازاق ەلىندە تۇڭعىش رەت وتكىزىلگەلى وتىرعان دۇنيەجۇزىلىك قىسقى ۋنيۆەرسيادا, قۇداي قالاسا, ەگەمەن ەلىمىزدى دۇنيە جۇزىنە تاعى ءبىر تانىتىپ, ابىروي بيىگىنە شىعارعالى وتىر. ۋنيۆەرسيادانى الماتىدا وتكىزۋ تۋرالى رەسمي شەشىم 2011 جىلعى 29 قاراشادا بريۋسسەلدە حالىقارالىق ۋنيۆەرسيتەتتىك سپورت فەدەراتسياسىندا (FISU) وتكەن داۋىس بەرۋ ناتيجەسىندە قابىلدانعانى بەلگىلى. سول جىلى ەلىمىزدە 7-ءشى قىسقى ازيا ويىندارى جوعارى دەڭگەيدە وتكىزىلگەنىن ەسكەرسەك, الماتى قىسقى ۋنيۆەرسيادا وتكىزۋ قۇقىعىن قالپاقپەن ۇرىپ الدى دەۋگە بولادى. شىنىندا دا, وڭتۇستىك استانا­مىزداعى «سۇڭقار» شاڭعىمەن سەكىرۋ حالىقارالىق كەشەنى, بالۋان شولاق اتىنداعى سپورت سارايى جانە الماتى وبلىسىنداعى شاڭعى-بياتلون ستاديونى ەڭ جوعارى دەڭگەيدەگى قىسقى سپورت جارىستارىن وتكىزۋگە تاپتىرمايتىن نىساندار. ودان بولەك, ايگىلى «مەدەۋ» مۇز ايدىنى مەن «شىمبۇلاق» تاۋ-شاڭعىلى كۋرورتى بار. ۋنيۆەرسيادا ءۇشىن قوسىمشا تاعى «الماتى ارەنا», «حالىق ارەنا» سارايلارى مەن اتلەتتەر قالاشىعى سالىندى. سپورتتىڭ ون ەكى تۇرىنەن وتكىزىلەتىن دۇنيەجۇزىلىك دوداعا الەمنىڭ 60-قا جۋىق ەلىنەن 2 مىڭنان استام ستۋدەنت-سپورتشى كەلەدى. سپورتشىلارمەن بىرگە كەلەتىن باپكەر, كومەكشىلەردى ايتپاعاندا, جانكۇيەر, تۋريست رەتىندە اعىلاتىن قوناقتاردىڭ ءوزى الماتىنى قان بازارعا اينالدىرارى حاق. «قوناق از وتىرىپ, كوپ سىنايدى» دەگەن, ۇلتى دا, سالتى دا باسقا ەلدەردىڭ كوڭىلىن تابۋ قوناقجاي تابيعاتىمىزعا سىن. ۋنيۆەرسيادانى ۇيىمداستىرۋ جانە وتكىزۋ جونىندەگى ديرەكتسيانىڭ جەتەكشىسى نايل نۋروۆتىڭ ايتۋىنشا, الماتى سپورتشىلار مەن قوناقتاردى قارسى الۋعا 100 پايىز دايىن. قوناقتاردى كۇتۋدەن بولەك, ولاردىڭ مەيلىنشە قاۋىپسىز بولۋى دا ابدەن ويلاستىرىلعان. ۋنيۆەرسيادا ۇيىمداستىرۋ كوميتەتi تەپلوۆيزور جابدىعىن ساتىپ الىپ, اۋەجايعا ورنالاستىردى. اتالعان جابدىق ويىندارعا كەلگەن سپورتشىنىڭ دەنiنiڭ ساۋ-سىرقات ەكەندiگiن اۋەجايدا-اق انىقتاپ بەرەدi. قازاقستاننىڭ ستۋدەنتتىك قۇراما­سىنىڭ سەگىز قىسقى ۋنيۆەرسياداعا قاتىسقان تاجىريبەسى بار. وسى ۋاقىت ارالىعىندا قازاقستان قۇراماسى قورجىنىنا 43 ناگرادا سالعان. ماراپات ماسەلەسىن ايتقاندا, ۋنيۆەرسيادا جەڭىمپازدارى مەن جۇلدەگەرلەرىنە تابىستالاتىن مەدال جيىنتىقتارى دا ءازىر. «مەدالدار ۋنيۆەرسيادا برەندى مەن حالىقارالىق ستۋدەنتتىك فەدەراتسيانىڭ تالاپتارىنا سايكەس جاسالدى. ۋنيۆەرسيادا ۇرانى ءۇش تىلدە جازىلعان», – دەيدى ۋنيۆەرسيادانى ۇيىمداستىرۋ ءجا­نە وتكىزۋ جونىندەگى ديرەكتسياسى جەتەك­شىسىنىڭ ورىنباسارى كاميلا لۇق­پانوۆا. مادەنيەت جانە سپورت ءمينيسترى ارىستانبەك مۇحامەدي ۇلى ۋني­ۆەر­سيادا جۇلدەگەرلەرىنە بەرىلەتىن اق­شالاي سىيلىقتاردىڭ كولەمىن دە جاريا ەتتى. ياعني, التىن جۇلدەگە قول جەتكىزگەن سپورتشىمىز مەملەكەتتەن 4,9 ملن تەڭگە, كۇمىس جانە قولا مەدال العان جۇلدەگەرلەر, سايكەسىنشە, 3,3 ملن تەڭگە جانە 1,6 ملن تەڭگە سىيلىق الادى. XXVIII دۇنيەجۇزىلىك قىسقى ۋنيۆەرسيادادا ەكى مىڭنان استام سپورتشى 12 سپورت تۇرىنەن 85 مەدال جيىنتىعىن ساراپقا سالادى. جارىستار بiزدiڭ ەلدە وتەتiن بولعاندىقتان, ءاربiر سپورتشى ءۇشiن ابىرويلى بولۋ – مارتەبە. بiزدiڭ سپورتشىلار دا الەمدىك جارىسقا ساقاداي ساي. ارينە, سپورتشىلارىمىز 2011 جىلعى ازيا ويىندارىنداعىداي بايگەنىڭ الدىن بەرمەسە , ءبارiمiز ءۇشiن زور جەتiستiك. بiز دە ولارعا ۇمiتپەن قاراپ, زور سەنiم ارتامىز. الماتىدا وتەتىن دۇنيەجۇزىلىك قىسقى ۋنيۆەرسيادانىڭ تۇمارى رە­تىندە سۇڭقاردىڭ تاڭداپ الىنۋى دا بە­كەر­دەن بەكەر ەمەس. قىران قۇس جىل­دامدىقتى, جەڭىلدىكتى, كۇش-قۋات پەن جەڭىسكە دەگەن قۇلشىنىستى بەي­نە­لەپ قانا قويماي, قاشاننان قازاقى تابيعاتقا ءتان ورلىك پەن ەرلىكتىڭ دە بەلگىسى بولعان. سوعان سايكەس «قا­ناتىڭدى كەڭ سەرپى!» تىركەسى ۋني­ۆەر­سيادا ۇرانى رەتىندە لايىقتى تاڭ­دا­لىپتى. ايتۋلى دودادا قازاقستان سپورت­شىلارىنىڭ – ەلىمىزدىڭ ۇكىلى ۇمىتتەرىنىڭ جەڭىس تۇعىرىنان كوپتەپ كورىنىپ, ازات ەلدىڭ ابىرويىن اسقاقتاتا ءتۇسۋىن تىلەيمىز! العا, قازاق ەلىنىڭ جاس­تارى! بولاتبەك قاۋىسوۆ, س.بەردىقۇلوۆ اتىنداعى سىيلىقتىڭ لاۋرەاتى