سەناتتا اقپاراتتىق قاۋىپسىزدىك تۇجىرىمداماسى تالقىلاندى

بۇگىن سەناتتا قازاقستان رەسپۋبليكاسىنىڭ 2016 جىلعا دەيىنگى اقپاراتتىق قاۋىپسىزدىك تۇجىرىمداماسىن ىسكە اسىرۋ قورىتىندىلارى تالقىلاندى. شاراعا سەناتورلار مەن مۇددەلى مەملەكەتتىك ورگانداردىڭ وكىلدەرى قاتىستى. كەزدەسۋدى اشقان سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا اقپاراتتىق قاۋىپسىزدىك, جالپى ۇلتتىق قاۋىپسىزدىكتى قامتاماسىز ەتۋ جۇيەسىن دامىتۋداعى ۇزاق مەرزىمدى جانە باسىم باعىتتارىنىڭ ءبىرى بولىپ تابىلاتىنىن اتاپ ءوتتى. اقپارات جانە كوممۋنيكاتسيا ءمينيسترىنىڭ ورىنباسارى الان اجىباەۆ تۇجىرىمدامانى ىسكە اسىرۋدىڭ نەگىزگى قورىتىندىلارى تۋرالى دەپۋتاتتاردى حاباردار ەتتى. اتاپ ايتقاندا ول تەحنولوگيا مەن تەلەكوممۋنيكاتسيانى دامىتۋدىڭ احۋالىنا, اقپاراتتىق جۇيەلەردىڭ قاۋىپسىزدىگىن قامتاماسىز ەتۋگە, بۇقارالىق اقپارات قۇرالدارىندا وتاندىق ءونىمدى ارتتىرۋعا, سونداي-اق نورماتيۆتىك-قۇقىقتىق نەگىزدەردى جەتىلدىرۋگە توقتالدى. قورعانىس جانە اەروعارىش ونەركاسىبى ءمينيسترىنىڭ ورىنباسارى دميتري گولوبۋردا اقپارات سالاسىنداعى ماڭىزدى قاۋىپتەرگە قارسى مەكەمەنىڭ ءىس-قيمىلى جونىندەگى الداعى جوسپارلارى تۋرالى اڭگىمەلەدى. تالقىلاۋعا سەناتورلار م. التىنباەۆ, ن. ابىقاەۆ, ي. ادىربەكوۆ, س. جاقسىبەكوۆ, گ. كيم قاتىستى. پىكىرتالاس بارىسىندا الداعى كەزەڭدە وسى سالانى رەتتەۋگە ارنالعان ستراتەگيالىق قۇجاتتاردى ازىرلەۋ ماسەلەلەرى كوتەرىلدى. دەپۋتاتتار اقپاراتتىق قاۋىپسىزدىك سالاسىن تەحنولوگيالىق تۇرعىدا جانە ماماندارمەن قامتاماسىز ەتۋ, سونداي-اق وسى ماسەلەدەگى مەكەمە ارالىق ءوزارا ءىس-قيمىلدىڭ كەيبىر ماسەلەلەرىنە نازار اۋداردى. كەزدەسۋ سوڭىندا كوميتەت توراعاسى د.نازارباەۆا تالقىلاۋ ناتيجەسى بويىنشا ازىرلەنگەن ۇسىنىستار ۇكىمەتكە جىبەرىلىپ, سونداي-اق زاڭ شىعارۋ جۇمىستارىندا ەسكەرىلەتىنىن اتاپ ءوتتى.