وڭتۇستىك قازاقستان وبلىسىندا تۇرعىنداردى تابيعي گازبەن قامتاماسىز ەتۋ جۇمىستارى قارقىندى جۇرگىزىلىپ كەلەدى. بۇگىندە ءوڭىر تۇرعىندارىنىڭ 61 پايىزى كوگىلدىر وتىنمەن قامتاماسىز ەتىلگەن. بۇل تۋرالى بۇگىن وقو ايماقتىق كوممۋنيكاتسيا قىزمەتىندە وتكەن بريفينگتە وبلىستىق ەنەرگەتيكا جانە تۇرعىن ءۇي - كوممۋنالدىق شارۋاشىلىق باسقارماسىنىڭ باسشىسى مارعۇلان مارايىم مالىمدەدى.
ونىڭ ايتۋىنشا, 2016 جىلى 25 ەلدى مەكەندەگى تابيعي گاز قۇرىلىسىنا 13,7 ملرد تەڭگە ءبولىنىپ, تولىعىمەن يگەرىلدى. ناتيجەسىندە 300 ەلدى مەكەندە تۇراتىن 1 ملن 755 مىڭ 306 تۇرعىن كوگىلدىر وتىنمەن قامتىلعان. ال 9 جوبانىڭ قۇرىلىسى جىل سوڭىنا دەيىن اياقتالاتىن بولادى.
ودان بولەك, 2016 جىلى 47 ەلدى مەكەندەگى تۇرعىنداردى وبلىستىق بيۋدجەت ەسەبىنەن تابيعي گازبەن قامتاماسىز ەتۋ ءۇشىن جوبالىق سمەتالىق قۇجاتتاردى ازىرلەۋدە. مۇنداعى جۇمىستاردى 2017 جىلدىڭ ءبىرىنشى توقسانىندا اياقتاۋ جوسپارلانىپ وتىر.
ال بيىل 79 نىسانعا وبلىستىق بيۋدجەتتەن 13,7 ملرد تەڭگە ءبولىنىپتى. ەگەر قۇرلىس جۇمىستارى مەجەلەگەن مەرزىمدە اياقتالسا, 357 ەلدى مەكەندە تۇراتىن 1 ملن 855 مىڭ ادام تابيعي گازبەن قامتاماسىز ەتىلەتىن بولادى. ياعني, بۇل وبلىس حالقىنىڭ 65,3 پايىزىن قۇرايدى. سونداي-اق 2017-2020 جىلدارى 960 مىڭ تۇرعىنى بار 383 ەلدى مەكەندى گازداندىرۋ جۇمىستارى قولعا الىنادى. جوبا تولىعىمەن جۇزەگە اسقان جاعدايدا 2021 جىلى وبلىستاعى گازداندىرىلعان اۋىلدار سانى 683-كە ارتاتىن بولادى. ناقتىراق ايتساق, 2 ملن 715 مىڭ تۇرعىن كوگىلدىر وتىرعا قول جەتكىزەدى. بۇل وبلىس حالقىنىڭ 81 پايىزىن قۇرايدى.
