انتاركتيداعا ساپار قورىتىندىلاندى

ەكسپەديتسيا 42 كۇن بويى ءوتتى. وندا ەكسپەديتسيا مۇشەلەرى انتاركتيدانىڭ سارىشۇناق سارى ايازىندا عىلىمي زەرتتەۋلەر جۇرگىزىپ قايتتى. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن انتاركتيداعا بارعان «تاۋەلسىزدىك ءپوليۋسى» عىلىمي-زەرتتەۋ ەكسپەديتسياسىنىڭ قورىتىندىسى تۋرالى ءباسپاسوز ءماسليحاتىندا بەلگىلى بولدى. ەكسپەديتسياعا كوماندا كاپيتانى ماعجان ساعىمباەۆ, سپورتشىلار يۋري يۋشين, ءىلياس عالىمبەكوۆ, عىلىمي قىزمەتكەرلەر داۋلەت ءشارىپوۆ, ارمان بايمۇحامەدوۆ پەن كوماندانىڭ جالعىز ارۋى - ءاليا ەرنازاروۆا قاتىستى. ولار انتاركتيدانىڭ ۆينسون شىڭىنا شىعىپ, وڭتۇستىك پوليۋسكە شاڭعىمەن جەتتى. بريفينگتە عىلىمي ساپار تۋرالى "قازاق گەوگرافيالىق قوعامى" قب تورالقا توراعاسى تولەگەن تاستانبەكوۆ باياندادى. ول ەكسپەديتسيانىڭ ءمانى مەن ماڭىزى تۋرالى كەڭىنەن ايتىپ بەردى. «جوبانىڭ بارلىق ءۇش كەزەڭى ءساتتى ءوتتى. ءبىزدىڭ قىز-جىگىتتەر ۆينسون شىڭىنا شىعىپ, شاڭعى ەكسپەديتسياسى مەن عىلىمي زەرتتەۋلەردى جۇرگىزىپ قايتتى. ەلىمىزدىڭ تاريحىندا العاش رەت تاۋەلسىزدىك كۇنى قازاقستاننىڭ مەملەكەتتىك تۋى انتاركتيدانىڭ ەڭ بيىك نۇكتەسىنە كوتەرىلدى. ەكسپەديتسياعا قاتىسۋشىلار وتانداستارىمىزعا ەكى رەت سىي جاسادى. ياعني, ولار 16 جەلتوقساندا ۆينسون شىڭىنان ەلىمىزدى تاۋەلسىزدىك كۇنىمەن قۇتتىقتاپ, 31 جەلتوقساندا وڭتۇستىك پوليۋسىنەن جاڭا جىل قارساڭىندا قۇتتىقتاۋ سوزدەرىن جولدادى. ەكسپەديتسيا كوپتەگەن ادامداردىڭ اتسالىسۋىمەن جۇزەگە استى. وسىعان وراي, مەن شىن جۇرەكتەن قازاقستان ۇلتتىق گەوگرافيالىق قوعامى QazaqGeography قامقورشىلىق كەڭەسىنىڭ توراعاسى كارىم ماسىموۆكە, QazaqGeography باسقارما كەڭەسىنىڭ توراعاسى قانات بايعارينگە, قحا توراعا ورىنباسارى ەرالى توعجانوۆقا, اقپارات جانە كوممۋنيكاتسيالار ءمينيسترى داۋرەن  اباەۆقا, «بايتەرەك» حولدينگىنىڭ باسقارما توراعاسى ەربولات  دوساەۆقا, «قازاق گەوگرافيالىق قوعامى» قب قامقورشىلار كەڭەسىنىڭ توراعاسى نۇرلان ابدۋوۆقا, نازارباەۆ ۋنيۆەرسيتەتىنىڭ پرەزيدەنتى  شيگەو كاتسۋعا, ءال-فارابي اتىنداعى قازۇۋ-ءنىڭ رەكتورى عالىمقايىر مۇتانوۆقا, د.س. اسفەندياروۆ اتىنداعى قازۇمۋ-ءنىڭ ءبىرىنشى پرورەكتورى نۇرگۇل حامزيناعا, سونىمەن بىرگە جۋرناليستەر, بلوگەرلەر مەن بارشا قازاقستان حالقىنا بىزگە سەنىم ارتىپ, قولداۋ كورسەتكەندەرىڭىز ءۇشىن العىسىمدى بىلدىرەمىن. شىن جۇرەكتەن سىزدەرگە ۇلكەن راقمەت!», - دەدى ول. اتلەتتەر ماعجان ساعىمباەۆ, يۋري يۋشين, ءىلياس عالىمبەكوۆ مەن دارىگەر داۋلەت ءشارىپوۆ وڭتۇستىك پوليۋسكە العاش رەت بارعان قازاقستاندىق شاڭعى ەكسپەديتسياسىنىڭ مۇشەلەرى بولىپ وتىر. ولار 11 كۇندە 217 شاقىرىمدى مۇزدىڭ ۇستىمەن ءجۇرىپ ءوتتى. جيىندا QazaqGeography الماتى قالاسى وڭىرلىك وكىلدىگىنىڭ باسشىسى, ەكسپەديتسيا توبىنىڭ جەتەكشىسى ماعجان ساعىمباەۆ تا انتاركتيدادا العان اسەرلەرىمەن ءبولىستى. «ەكسپەديتسيا كاپيتانى بولعانىما قۋانىشتىمىن.  بۇل مەن ءۇشىن ۇلكەن قۇرمەت. سول سەبەپتەن ءبىزدىڭ كوماندامىزدىڭ ءاربىر مۇشەسى 100 پايىزعا جۇمىس ىستەدى. ارينە, جولدا قيىن جاعدايلار دا بولدى. دەگەنمەن ءبىز قانداي قيىندىق بولسا دا ونىڭ ءبارىن جەڭە بىلدىك. بىزگە قولداۋ كورسەتىپ, سەنىم ارتقان بارشا قازاقستاندىقتارعا العىسىمدى بىلدىرەمىن. انتاركتيدادا ەكسپەديتسيا بارىسىندا جيناعان باعا جەتپەس ومىرلىك تاجىريبە ءۇشىن جانە بىرەگەي مۇمكىندىك ءۇشىن قازگەوگە جانە مەنىڭ دوستارىما العىسىم شەكسىز»,- دەدى ول. ەكسپەديتسيانىڭ عىلىمي بولىمىنە بيولوگيا سالاسىندا جانە انتاركتيدانىڭ توتەنشە  جاعدايىندا ادام فيزيولوگياسىنا اسەر بەرەتىن دەرەكتەردى تالداعان جاس قازاقستاندىق عالىمداردىڭ زەرتتەۋلەرى ەندى. الداعى كەزدە سونىڭ ناتيجەسى بويىنشا دوڭگەلەك ۇستەل مەن شەبەرلىك ساباقتار وتكىزىلەدى. وسىعان بايلانىستى ەكسپەديتسيانىڭ عىلىمي قىزمەتكەرى ارمان بايمۇحامەدوۆ جاقىن ارادا ساپاردىڭ قورىتىندىسى جان-جاقتى زەرتتەلىپ, عىلىمي جۇمىستاردىڭ ناتيجەسى شىعاتىنىن, وعان ماماندار تالداۋ جاسايتىنىن اتاپ ءوتتى. «انتاركتيداعا جەر-ءجۇزىنىڭ كوپتەگەن عالىمدارى كەلەدى. ونى زەرتتەگىسى كەلەتىن ادامدار وتە كوپ. سوندىقتان ءبىز عىلىمي-زەرتتەۋ ەكسپەديتسياسىنىڭ مۇشەسى بولعانىمىز ءۇشىن قۋانىشتىمىز. ءبىزدىڭ عىلىمي توبىمىز ادام دەنساۋلىعى مەن قورشاعان ورتانى قورعاۋ سالاسىندا زەرتتەۋلەر جۇرگىزۋ ءۇشىن كوپتەگەن دەرەكتەر جينادى. يۋنيون گلەتچەر بازاسىندا بولعانىمىزدا شەتەلدىك عالىمدارمەن تانىسىپ, انتاركتيدانى زەرتتەگەن جەتەكشى ەلدەردىڭ زەرتتەۋ تاجىريبەلەرىن قابىلداپ كەلدىك. ەندى ساپاردىڭ ناتيجەسىنە تالداۋ جاسايتىن بولامىز», دەدى جاس عالىم. بۇل وتانداستارىمىزدىڭ اق قۇرلىققا جاساعان العاشقى ساپارى ەمەس. العاش رەت قازگەو كومانداسىنىڭ 15 مۇشەسى انتاركتيداعا 2011 جىلى بارعان بولاتىن. سودان كەيىن ولار اركتيكا مەن انتاركتيكادا ەكى رەت بولىپ قايتتى. داستان كەنجالين, «ەگەمەن قازاقستان»