شۇمەنوۆ: قارسىلاسىم جەكپە-جەك مەرزىمىن ۇزارتقىسى كەلەدى

وتكەن جىلدىڭ قاراشا ايىندا WBA شتاب-پاتەرىندە (دۇنيەجۇزىلىك بوكس قاۋىمداستىعى) قازاقستاندىق بەيبىت شۇمەنوۆ (17-2, 11 كو) پەن ءبىرىنشى اۋىر سالماقتا WBA (Regular) بەلبەۋىنىڭ جانە WBA نۇسقاسى بويىنشا ۋاقىتشا الەم چەمپيونى كۋبالىق يۋنيەر دورتيكوستىڭ (21-0, 20 كو) اراسىندا جەكپە-جەك وتكىزۋ تۋرالى ساۋدا جۇرگىزىلگەن. بۇل ساۋدانى كۋبالىق سپورتشىنىڭ  Caribbean Promotions كومپانياسى جەڭىپ العان. ايقاس 11 اقپان كۇنى وتكىزىلۋى ءتيىس بولاتىن. الايدا, ءالى كۇنگە دەيىن وسى جونىندە رەسمي اقپارات جاريالانعان جوق. «وزدەرىڭىز بىلەتىندەي ساۋدا جۇرگىزىلدى. ولاردىڭ ەرەجەسى بويىنشا جەكپە-جەك 90 كۇننىڭ ىشىندە وتكىزىلۋى ءتيىس. بۇل ءىستى كۋبالىق تاراپ جەڭىپ العاننان كەيىن ماعان 11 اقپانعا ارنالعان كەلىسىمشارت ۇسىندى. كەزدەسۋ ماياميدە ۇيىمداستىرىلۋى كەرەك بولعان. بىراق وسىدان ءتورت-بەس كۇن بۇرىن دورتيكوستىڭ وكىلدەرى WBA ۇيىمىنا ۋاقىتىن سوزۋ جونىندە ءوتىنىش جاساپتى. مۇنداي كەزدە جوسپار تەك تابيعي اپات نەمەسە ءورت بولعان جاعدايدا عانا ۇزارتىلادى. ال ەش سەبەپسىز بۇل جاعدايعا رۇقسات بەرۋ ەش زاڭعا سايكەس كەلمەيدى», – دەدى شۇمەنوۆ. «كەلىسىمشارتقا قول قويىلعاننان كەيىن دايىندىقتى باستاپ كەتتىم. سوندىقتان زاڭگەرلەرىم 11 اقپاندا جوسپاردىڭ ورىندالۋى نەمەسە گونورارىمدى تولەۋى ءۇشىن ءتيىستى شارالار قولدانىپ جاتىر. مۇنداي ورىنسىز جاعدايدان مەن شىعىنعا ۇشىرايمىن. سونداي-اق, قازىر مانسابىم دا ءبىر ورىندا توقتاپ قالدى», – دەدى بوكسشى. «WBA كۋبالىقتاردىڭ سۇرانىسىن قاناعاتتاندىرادى دەپ ويلامايمىن. ەگەر دورتيكوسقا قارسى شىقپاسام, مەنەدجەرىم ەل حەيمونمەن اقىلداسامىن. 28 قاڭتار كۇنى لاس-ۆەگاستا ۇلكەن شوۋ بولادى, مۇمكىن سول كۇنگە اۋىستىرار. بۇعان قۋانا-قۋانا كەلىسەر ەدىم. سەبەبى, دەڭگەيىمدى ءبىر قالىپتا ۇستاپ تۇرۋ دا وڭاي شارۋا ەمەس», – دەدى قازاقستاندىق بىلعارى قولعاپ شەبەرى.