اقان ساتاەۆ توميريس تۋرالى فيلم تۇسىرەدى

تانىمال رەجيسسەر اقان ساتاەۆ ساقتاردىڭ كوشباسشىسى - تۇمار حانشايىم تۋرالى تاريحي ءفيلمدى ءتۇسىرۋدى جوسپارلاپ ءجۇر, دەپ حابارلايدى قازاقپارات. «ءيا, ءدال وسى كينونى تۇسىرۋگە ۇلكەن نيەت بار. ءبىز الەمدىك تاريحتى وزگەرتكەن تۇلعالار تۋرالى تاريحي فيلمدەردى ءتۇسىرۋىمىز كەرەك. وسىنى ءتيىستى دەڭگەيدە, حالىقارالىق دارەجەدە جاساي الاتىن بولساق, حالىقتىڭ كوڭىلىنەن شىعىپ قانا قويماي, فيلمگە كەتكەن شىعىندى دا تولىعىمەن اقتاي الامىز. ونداي كارتينالاردى تاياۋ شىعىس, امەريكا جانە تاعى باسقا ەلدەرگە حالىقارالىق پروكاتقا شىعارۋعا بولادى», - دەدى ساتاەۆ. ونىڭ ايتۋىنشا, بۇگىندە ءفيلمنىڭ ءسينوپسيسى, ياعني ستسەناريدىڭ قىسقارتىلعان نۇسقاسى دايىن. قارجى ماسەلەسى ءالى شەشىلمەگەن. دەگەنمەن, رەجيسسەر ءتۇسىرۋ جۇمىستارىن اعىمداعى جىلدان قالماي باستاۋعا نيەتتى. ايتا كەتەيىك, ەسىمى ەجەلگى جازبالاردا كەزدەسەتىن توميريس ساقتاردىڭ بايىرعى زاماندا ەل بيلەگەن اتاقتى حانشايىمى.