ءماجىلىستىڭ 2017 جىلعى ءبىرىنشى جالپى وتىرىسى وتۋدە

پارلامەنت ءماجىلىسىنىڭ سپيكەرى نۇرلان نىعماتۋلين پالاتانىڭ 2017 جىلداعى ءبىرىنشى وتىرىسىن اشتى. ول بۇل جيىن وسى جىلداعى ءبىرىنشى وتىرىس ەكەنىن, ساپالى زاڭمەن قامتۋ جولىندا اتقارىلار جۇمىستىڭ كوپ ەكەنىن ايتتى. ول بيىلعى ءبىرىنشى وتىرىستا دەپۋتاتتاردىڭ جەرگىلىكتى وزىندىك باسقارۋدى دامىتۋ ماسەلەلەرى بويىنشا زاڭ جوباسىن ءبىرىنشى وقىلىمدا قارايتىنىن حابارلادى. "الداعى ۋاقىتتا دەنساۋلىق ساقتاۋ جانە الەۋمەتتىك-ەڭبەك سالاسىنداعى ماسەلەلەر بويىنشا زاڭ جوباسىن قارايمىز. سونداي-اق, جول قوزعالىسى, اقپارات جانە كوممۋنيكاتسيا ماسەلەلەرى, كوممەرتسيالىق ەمەس ۇيىمداردىڭ قىزمەتى سياقتى ماڭىزدى زاڭ جوبالارىن مۇقيات قاراۋىمىز كەرەك. جۇمىس جوسپارىندا كودەكستەر بار - سالىق پەن جەر كودەكستەرى. زاڭ جوبالارىن قاراۋ كەزىندە ازاماتتىق قوعام وكىلدەرىمەن ۇنەمى ديالوگ بولىپ, جالعاسىن تابۋى كەرەك جانە پالاتا جۇمىسىنىڭ اقپاراتتىق اشىقتىعى قامتاماسىز ەتىلۋى ءتيىس. ورتالىق اتقارۋشى ورگانداردىڭ قىزمەتىنىڭ ءتۇرلى اسپەكتىن پارلامەنتتىك باقىلاۋدى قامتۋدا ۇكىمەت ساعاتىنىڭ ماڭىزى زور", - دەدى نۇرلان نىعماتۋلين. تومەنگى پالاتانىڭ توراعاسىنىڭ ايتۋىنشا, بۇل سەسسيانىڭ سوڭىنا دەيىن ءماجىلىس دەپۋتاتتارىنىڭ الدىندا ۇكىمەت ساعاتى اياسىندا ۇكىمەتتىڭ 15 ءمينيسترىنىڭ 11-ءى قازاقستاندىق قوعامنىڭ نازارىنداعى پروبلەمالارعا قاتىستى ءسوز سويلەيدى. "بۇل ءبىرىنشى كەزەكتە ىشكى جانە سىرتقى ساياسات ماسەلەلەرى, ەلدىڭ ەكونوميكالىق جانە الەۋمەتتىك ءومىرى ماسەلەلەرى. پارلامەنتتىك تىڭداۋلار وتكىزىلەدى, وسى ماسەلەدە ەڭ وزەكتى "قازاقستان رەسپۋبليكاسىندا ءدارى قۇرالدارىمەن قاماتامسىز ەتۋ جانە فارماتسەۆتيكالىق سالالاردىڭ دامۋ جاعدايى تۋرالى" تاقىرىبى بويىنشا شەشىم قابىلدانعان. وسىلايشا, ءماجىلىس قىزمەتىنىڭ نەگىزگى باعىتى زاڭ شىعارۋ ساپاسى, بارلىق مەملەكەتتىك ورگاننىڭ زاڭدى جۇزەگە اسىرۋىن باقىلاۋدى كۇشەيتۋ بولادى. اتقارىلار جۇمىس كوپ, قاۋىرت جۇمىس", - دەپ قورىتىندىلادى ءسوزىن نىعماتۋلين.