قازاقستاندا "حالال" ءونىمىن راستايتىن ۇلتتىق جۇيە ازىرلەنەدى

قازاقستاندا «حالال» ءونىمدى راستايتىن ۇلتتىق جۇيە ازىرلەنىپ جاتىر. قر ينۆەستيتسيالار جانە دامۋ مينيسترلىگى مەترولوگيا مەن تەحنيكالىق رەتتەۋ كوميتەتىنىڭ توراعاسى ءبىرجان كانەشوۆتىڭ ايتۋىنشا, اتالعان جۇيەنى ازىرلەۋگە مالايزيالىق ساراپشىلار كومەكتەسەدى, دەپ حابارلايدى قازاقپارات. «بۇگىندە ەلىمىزدە «حالال» ماركاسىمەن شىعارىلاتىن ونىمدەر كوپ. الايدا سونىڭ بارلىعىن ءبىر-ەكى ستاندارتپەن رەتتەپ وتىرۋ قيىن. جالپى, ءونىم ساپاسىنىڭ بۇل باعىتى زاڭمەن تولىعىمەن رەتتەلمەي كەلەدى. سونىڭ ناتيجەسىندە «حالال» برەندىنە مۇلدەم سايكەس كەلمەيتىن ونىمدەر شىعارىلادى», - دەيدى كانەشوۆ. ونىڭ ايتۋىنشا, وسى سالاداعى جۇمىستى رەتكە كەلتىرۋ ءۇشىن ءبىر-اق شارۋانىڭ باسىن قايىرۋ قاجەت. اتاپ ايتقاندا, IFOM (ورگانيكالىق اۋىل شارۋاشىلىعى ءۇشىن قوزعالىستىڭ حالىقارالىق فەدەراتسياسى) ستاندارتتارىن قابىلداپ, باسىمدى باعىتتار بويىنشا تەحنيكالىق كوميتەتتەردى قۇرۋ قاجەت. بۇدان بولەك, حالىقارالىق جانە ايماقتىق ستاندارتتاردى تەڭەستىرگەن ءجون. سونداي-اق «حالال» برەندىمەن شىعارىلعان تاۋارلاردى باقىلايتىن كاسىبي مامانداردى دايارلاۋ - اسا ماڭىزدى ءىس. دەگەنمەن, وسى ۋاقىتقا دەيىن كوميتەت ماماندارى بىرقاتار شارالاردى اتقارىپ ۇلگەردى. «ءبىز ارنايى كەلىسىمشارتقا قول قويدىق. ونىڭ نەگىزگى ماقساتى - حالىقارالىق تاجىريبەنىڭ نەگىزىندە قازاقستاندا حالال-يندۋسترياسىن قۇرۋ. وسىلايشا, اعىمداعى جىلى قاڭتاردىڭ سوڭىندا ەلىمىزگە مالايزيالىق ساراپشىلار كەلەدى. ولاردىڭ قاتىسۋىمەن قازاقستانداعى «حالال» ۇلتتىق جۇيەسىنىڭ نەگىزگى تەتىكتەرىن ازىرلەۋ كوزدەلىپ وتىر. وسى جۇمىسقا قۇزىرەتتى مەملەكەتتىك ورگاندار دا اتسالىسادى», - دەپ اتاپ كورسەتتى كوميتەت باسشىسى.