استانا مەن الماتى تۇرعىندارى حقكو جۇكتەمەلەرىن باقىلاي الادى

«ازاماتتارعا ارنالعان ۇكىمەت» مەملەكەتتىك كورپوراتسياسى استانا مەن الماتى قالالارى حالىققا قىزمەت كورسەتۋ ورتالىقتارىنىڭ (حقكو) جۇكتەمەلەرىن باقىلاۋ مۇمكىندىگىن جۇزەگە اسىردى, دەپ حابارلادى قازاقپارات. رەتتەۋ زالى, قۇجاتتاندىرۋ جانە بانك كاسسالارى قىزمەتتەرىنىڭ جۇكتەمە دەڭگەيىن كورسەتەتىن ديناميكاعا سىلتەمە مەملەكەتتىك كورپوراتسيانىڭ goscorp.kz رەسمي سايتىنىڭ باستى پاراعىندا ورنالاستىرىلعان. «ازاماتتارعا ارنالعان ۇكىمەت» مەملەكەتتىك كورپوراتسياسى» كوممەرتسيالىق ەمەس» اق مەملەكەتتىك قىزمەتتەر ءادىسناماسى جانە مونيتورينگى دەپارتامەنتىنىڭ ديرەكتورى گۇلجان اسانوۆانىڭ ايتۋىنشا, اتالعان سەرۆيس ازاماتتارعا قولايلى بولۋ ءۇشىن قۇرىلعان جانە ولاردىڭ حقكو-عا بارۋىن الدىن الا جوسپارلاۋعا مۇمكىندىك بەرەدى. «وسى دياگرامما بويىنشا ادام مەيلىنشە تەز قىزمەت الۋ ءۇشىن قاي حقكو-عا بارۋ كەرەكتىگىنە باعا بەرە الادى. ياعني, ەگەر وعان كوشى-قون سالاسى بويىنشا قىزمەت كەرەك بولماسا, ۋاقىتشا تىركەۋ قىزمەتى بويىنشا قىزمەت الۋشىلار اعىنى كوپ حقكو-عا بارۋ قاجەت ەمەس, ول كەلۋشىلەر سانى از كەز كەلگەن باسقا ورتالىققا جۇگىنە الادى», - دەدى ول. سونىمەن قاتار, گۇلجان اسانوۆا ازىرگە تەك استانا جانە الماتى قالالارىنداعى حقكو-لاردا جۇكتەمەنى كورۋگە بولاتىنىن, جاقىن ارادا قازاقستاننىڭ باسقا حقكو-لارىنا كەلۋشىلەر سانىن باقىلاۋ مۇمكىندىگى قاراستىرىلاتىنىن اتاپ ءوتتى. اقپارات ءار ساعات سايىن جاڭارتىلاتىن بولادى.