وقو-دا جەدەل جاردەم قىزمەتىنە 30 كولىك بەرىلدى

وڭتۇستىك قازاقستان وبلىسىنداعى جەدەل جاردەم قىزمەتىنە 30 اۆتوكولىك تابىس ەتىلدى, دەپ حابارلادى وقو اكىمىنىڭ ءباسپاسوز قىزمەتى. «بۇكىل دۇنيە جۇزىندە جەدەل جاردەم قىزمەتى 7 مينۋتقا دەيىن, ارى كەتكەندە 10 مينۋتقا دەيىن بارۋى كەرەك. وكىنىشكە قاراي, كەيبىر جەرلەردە بۇل شارتتار مەن تالاپتار ورىندالماي جاتادى. سوندىقتان, بۇگىنگى سىيعا تارتىلعان اۆتوكولىكتەر وسى قيىندىقتاردى جويىپ, ازايتۋ ماقساتىندا بەرىلىپ وتىر. جالپى, وبلىستا جەدەل جاردەم قىزمەتىن كورسەتەتىن 261 كولىك بار. ونىڭ 20 پايىزدان استامى بۇگىنگى كۇنگە جارامسىز دەپ ايتۋعا بولادى. سول سەبەپتى, ولاردى جىل سايىن ازايتىپ, ورنىن جاڭا كولىكتەرمەن الماستىرىپ وتىراتىن بولامىز. سىزدەردەن تالابىمىز - توتەنشە جاعدايلار كەزدەرىندە وبلىس تۇرعىندارىنىڭ دەنساۋلىعىن بارىنشا ساقتاپ قالۋعا تىرىسىپ, ۇيلەرىنە تەز جەتۋ, كومەكتەسۋ, قۇتقارۋ ماسەلەسىندە ايانباي قىزمەت ەتۋ», - دەدى جانسەيىت قانسەيىت ۇلى جەدەل جاردەم قىزمەتىنىڭ ماماندارىمەن جۇزدەسۋدە. باسقوسۋدا اكىم جەدەل جاردەم قىزمەتىندەگى ماسەلەلەردى شەشۋ ءۇشىن وڭىردە بيىل 8 قوسىمشا بريگادانىڭ قۇرىلاتىنىن ايتىپ, وسى جىلدىڭ ەنشىسىنە تاعى دا 22 كولىكتىڭ تاپسىرىسقا بەرىلگەنىن حابارلادى. سونداي-اق, ول شىمكەنت قالالىق جەدەل جاردەم ستانساسىن مەملەكەتتىك-جەكەمەنشىك ارىپتەستىك ارقىلى مودەرنيزاتسيالاۋ بويىنشا جۇمىستاردىڭ جۇرگىزىلەتىن دە ايتتى. بۇگىنگى پايدالانۋعا بەرىلگەن 30 كولىكتىڭ 20-ى شىمكەنت قالاسىنا, 10-ى وبلىس اۋداندارىنا بەرىلىپ وتىر. بۇل ءۇشىن وبلىستىق بيۋدجەتتەن 418 ملن. تەڭگە قارالعان. ال 2017 جىلعا وبلىستىق بيۋدجەت ەسەبىنەن 535 ملن. تەڭگەگە تاعى 22 دانا اۆتوكولىك ساتىپ الۋ جوسپارلانۋدا. ايتا كەتۋ كەرەك, وقو-دا جەدەل جاردەم كومەگى شىمكەنت پەن تۇركىستان قالالارىنداعى 2 ستانتسيا مەن 16 ەمحاناعا قاراستى اۋداندىق, قالالىق بولىمشەلەردە قىزمەت كورسەتەدى. اتالعان قۇرىلىمداردا بارلىعى 194, ونىڭ ىشىندە, 78 دارىگەرلىك, 88 فەلدشەرلىك, 28 ماماندىرىلعان (كارديورەانيماتسيا, ينتەنسيۆتى تەراپيا - 17, جان ساقتاۋ - 6, پسيحياتريالىق - 2) بريگادالار جۇمىس ىستەيدى.