تۇركيانىڭ قۇرىلىس كومپانيالارى وقو-عا ينۆەستيتسيا سالماق

وڭتۇستىك قازاقستان وبلىسىنىڭ اكىمى جانسەيىت تۇيمەباەۆ قۇرىلىس سالاسىندا ءتۇرلى جوبالاردى ىسكە اسىرعان تۇرىك كومپانيالارىنىڭ جەتەكشىلەرىمەن كەزدەستى, دەپ حابارلادى وقو اكىمىنىڭ ءباسپاسوز قىزمەتى. وڭتۇستىك قازاقستانعا ينۆەستيتسيا سالۋعا نيەتتى «AKAY CONSTRUCTION INC» جانە «MESCIOGLU muhendislik ve musavirlik a.s.» كومپانيالارى جول قۇرىلىسى, تۇرعىن ءۇي قۇرىلىسى سالاسى مەن ولشەۋ اسپاپتارىن ءوندىرۋ جانە وزگە دە وندىرىستەر سالاسىندا جۇمىس جاسايدى. جۇزدەسۋ بارىسىندا تاراپتار قالادا تۇرعىن ءۇي قۇرىلىسى سالاسىندا بىرلەسكەن جوبالار قۇرۋدى جانە باسقا وندىرىستىك سالاعا تۇركيالىق ينۆەستورلاردى تارتۋ جايىن ءسوز ەتتى.  سونىمەن قاتار, كومپانيا باسشىلارى «Shymkent City» كەشەنىنىڭ قۇرىلىسىنا قىزىعۋشىلىق تانىتىپ وتىرعاندارىن جەتكىزدى. ايتا كەتەيىك, MESCIOGLU كومپانياسى 10 جىلدان بەرى ىستانبۇلدىڭ اۆتوموبيل جولدارى مەن جول قيىلىستارى باسقارماسىنىڭ جوبالارىن ازىرلەپ, كوپىر, وتپەجول, توننەل جانە اۆتوموبيل جولدارى جوباسىندا ينجينيرينگتىك قىزمەتتەر كورسەتىپ كەلەدى. 1985 جىلى قۇرىلعان «AKAY CONSTRUCTION INC» قۇرىلىس كومپانياسى  تۇرلى الەۋمەتتىك نىساندار مەن ۋنيۆەرسيتەتتەر, ۇلكەن ويىن-ساۋىق ورتالىقتارىن جانە 8300 تۇرعىن ءۇي كەشەنى سىندى تاعى دا باسقا عيماراتتار سالعان. اتالعان كومپانيالار قۇرىلىستىڭ ساپاسى جوعارى ءارى سالىناتىن الەۋمەتتىك ۇيلەردىڭ باعاسى تومەن بولاتىندىعىن ايتىپ وتىر.