ءۇش جىلدا 3-ورىنعا قول جەتكىزدى

ماڭعىستاۋدا كوكپار ويىنىن دامىتۋدىڭ قولعا الىنعانى­نا كوپ بولعان جوق. نەبارى 3 جىلدان استام ۋاقىت ىشىندە ءوڭىر كوكپارشىلارى جاقسى جەتىستىكتەرگە قول جەتكىزىپ ۇلگەردى, ولار ەل چەمپيوناتىندا ۇزدىك ۇشتىككە ەندى. ولاردىڭ اراسىنان 4 كوكپارشى ەكسپو-2017 كورمەسىندە وتەتىن حالىقارالىق تۋرنيرگە قاتىسىپ, ۇلتتىق ونەردى الەم ەلدەرى الدىندا تانىتۋ ءۇشىن قىزۋ دايىندىق ۇستىندە. ماڭعىستاۋدا وسىدان 3 جىل بۇرىن قۇرىلعان وبلىستىق ۇلتتىق سپورت تۇرلەرى كلۋبىندا كوكپاردان باسقا بايگە, اۋدارىسپاق, تەڭگە ءىلۋ, جامبى اتۋ, قىز قۋ, قۇسبەگىلىك, ساياتشىلىق سەكىلدى ۇلتتىق سپورت تۇرلەرىن دامىتۋ قولعا الىنعان. اۋىل بالالارىن سپورتقا باۋلۋ جانە ۇلتتىق سپورت تۇرلەرىن كوتەرۋ ماقساتىندا قۇرىلعان كلۋب­قا تارتىلعان 240 بالاعا 14 جات­تىق­تىرۋشى ءتالىم بەرەدى. مۇندا بالالار اتقا ءمىنىپ ۇيرەنىپ, ات باپتاۋدىڭ قىر-سىرىنا قانىعادى. ەكسپو-2017 كورمەسىنەن سوڭ ماڭعىستاۋدا ۇلتتىق سپورت كلۋبىنىڭ اياسى كەڭەيتىلىپ, بارلىق ۇلتتىق سپورت تۇرلەرىن قامتيتىن ورتالىق اشۋ جوباسى جاسالۋدا. گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى