سلوۆاكيا سپورتشىلارى ساقاداي ساي

الماتىنىڭ الدىندا قىسقى ۋنيۆەرسيادا ويىندارىن سلوۆاكيا ەلى قابىلداعانى بەلگىلى. ال الماتى­داعى جارىستارعا كەلەتىن بۇل ەلدىڭ سپورتتىق دەلەگاتسياسىنىڭ قۇرامىن­دا 63 ادام بار. سلوۆاكيا دا ستۋدەنتتىك سايىس­تاعى كىل مىقتىلارىن انىقتاۋ ءۇشىن قىسقى سپورت تۇرلەرىنەن تالاي جارىس وتكىزگەن. ادەتتە سلوۆاكيا سپورت­شىلارى حوككەي, مانەرلەپ سىرعاناۋ, بياتلون, سنوۋبورد, تاۋ-شاڭعىسى سپورتى جانە شاڭعى جارىستارىنان مىقتى بولىپ كەلەدى. ەلدەگى سپورتتىق ينف­را­قۇرىلىمنىڭ جاقسى دامۋى دا بۇعان ۇلكەن ىقپال جاساپ وتىر. سونىمەن سلوۆاكيا سپورتشىلارى تاۋ شاڭعىسى سپورتى مەن حوككەيدەن جۇلدە الۋدان دامەلى. ەسكە سالا كەتسەك, سلوۆاكيا 2015 جىلعى 27-ءشى قىسقى ۋنيۆەرسيادانى ءوز جەرىندە قابىلداعان بولاتىن. سول كەزدە FISU (حالىقارالىق ستۋدەنتتىك سپورت فەدەراتسياسى) شەشىمى بويىنشا سولتۇستىك باعدارلاما جانە بياتلون بويىنشا جارىستار سلوۆا­كيا­نىڭ شتربسكە-پلەسو جانە وسربلە قالالارىنداعى قىسقى سپورت ءتۇر­لەرىنە ارنالعان ورتالىقتاردا وتكىزىلدى. سلوۆاكيا سپورتشىلارى حوككەي جانە تاۋ شاڭعىسى سپورتىندا ءجۇل­دەلى ورىندار ءۇشىن كۇرەسۋدى كوزدەپ وتىر. وسى ەلدىڭ دەلەگاتسياسى فاۆوريت­تەر قاتارىندا شاڭعىشى ماتەي فالا­تانىڭ ەسىمىن اتايدى. ماتەي فالاتا 2015 جىلعى قىسقى ۋنيۆەر­سيادانىڭ قولا جۇلدەگەرى. سونداي-اق, قازاقستان جانكۇيەر­لەرىنە سلوۆاكيا قۇراماسى­نىڭ حوككەيشىسى ميحايل پيحنارچيكتىڭ ەسىمى دە جاقسى تانىس. قازىرگى تاڭدا ول پاۆ­لوداردىڭ «ەرتىس» حوككەي كلۋبى­نىڭ قورعاۋشىسى رەتىندە ونەر كورسەتىپ ءجۇر. الدا كەلە جاتقان ۋنيۆەرسيادادا ول سلوۆاكيا قۇراماسىنىڭ ساپىندا وينايتىن بولادى. ايناش ەسالي, «ەگەمەن قازاقستان» الماتى