جاڭا اۋرۋحانا جۇمىسىن باستادى

جاڭا جىلدىڭ اق تاڭى ەلىمىزدىڭ باتىس قاقپاسىنىڭ تۇرعىندارىنا ءوز جاقسىلىعى مەن قۋانىشىن الا كەلدى. ياعني, بيىلعى قاڭتار ايىنىڭ العاشقى كۇندەرىندە ورالدا كوپ بەيىندى قالالىق اۋرۋحانا ءوز قىزمەتىن باستادى. وسى ارقىلى اقجايىق ايماعىندا تۇرعىندارعا مەديتسينالىق قىزمەت كورسەتۋ ءىسى جاڭا ساپالىق دەڭگەيگە كوتەرىلدى دەۋگە تولىق نەگىز بار. سونىمەن بىرگە, قالالىق مارتەبەنى يەلەنگەن جاڭا ەمدەۋ ورنىنىڭ اشىلۋى وبلىستىق اۋرۋحاناعا ءتۇسىپ كەلگەن جۇكتەمەنى اجەپتاۋىر ازايتقانى دا باسى اشىق اقيقات. سوڭعى جىلدارى وڭىردە دەن­ساۋلىق ساقتاۋ مەكەمەلەرى كەڭەيە تۇسۋدە. دەگەنمەن, «بۇل ءان بۇرىڭعى اننەن وزگەرەك» دەگەندەي, جاڭا كوپ بەيىندى اۋرۋحانانىڭ ورنى مۇلدەم بولەك دەسەك ارتىق ايتقاندىق بولمايدى. رەسپۋبليكالىق بيۋد­جەتتىڭ ەسەبىنەن بوي كوتەرگەن ءساندى دە ساۋلەتتى اۋرۋحانانىڭ پايدالانۋعا بەرىلۋى ەلباسى ساياساتىنىڭ باسىم باعىتتارىنىڭ ءبىرى – ۇلت دەنساۋلىعىنا قامقور­لىقتىڭ باستى ءبىر كورىنىسى. ونىڭ قۇرىلىسىنا جانە قازىرگى زامانعى مەديتسينالىق قۇرال-جابدىقتار  ورناتۋعا 8 ميلليارد 300 ميلليون تەڭگە قارا­جات جۇمسالعان. اتالعان مەدي­تسينالىق قوندىرعىلار رەسەي­­دىڭ جانە گەرمانيا مەن جاپو­نيانىڭ جەتەكشى فيرمالارىنان جەتكى­زىلگەن. سىڭعىرلاعان سۋ جاڭا اۋرۋحانادا جۇيكە-ينسۋلت ورتالىعى, جالپى تەراپيا, تراۆماتولوگيا, گينەكولوگيا, كارديولوگيا, وتا جاساۋ جانە جان ساقتاۋ بولىمدەرى بار. سونىمەن بىرگە, پۋلمونولوگيا, ساۋلەلى دياگنوستيكا جانە رەنتگەن كابينەتتەرىنە دە ەڭ وزىق زاماناۋي قوندىرعىلار قويىلعان. كىرسە شىققىسىز عيمارات سەگىز نەگىزگى جانە بەس كومەكشى كورپۋستاردان تۇرادى. كوپ بەيىندى قالالىق اۋرۋحاناعا ءبىر مەزگىلدە 300 ادام ورنالاسىپ, ەم قابىلداي الادى. مۇنداعى قىزمەت ورىندارىنىڭ ءبارى اۆتوماتتى جۇيەگە قوسىلعان. جاڭا كلينيكا ۇجىمى تولىق جاساقتالعان. مۇندا شتات كەستەسى بويىنشا 140 دارىگەر جانە 300-دەن استام ورتا دەڭگەيدەگى مەديتسينا قىزمەتكەرلەرى ءوز قىزمەت­تەرىنە كىرىستى. تۇتاستاي العاندا, بۇگىندە ەلىمىزدە دەنساۋلىق ساقتاۋ سالاسىنداعى باستى پروب­لە­مالارىنىڭ ءبىرى – دارىگەر كادرلاردىڭ جەتىسپەۋى دەسەك قاتەلەسپەيمىز. وسىنداي كەزدە ەلىمىزدىڭ باتىس وڭىرىندەگى جا­ڭا قالالىق اۋرۋحانادا بۇل ماسەلەنىڭ تولىق شەشىمىن تاپقا­نى تاعى ءبىر مەرەي. مۇندا ءوز قىزمەتتەرىن باستاعان دارىگەرلەردىڭ دەنىن شەت­ەلدەردە جانە رەسپۋب­ليكا­مىزدىڭ ەڭ ۇزدىك كلينيكالارى مەن جوعارى مەديتسينالىق وقۋ ورىندارىندا تاجىريبەدەن وتكەندەر قۇرايدى. ولاردىڭ اراسىندا «بولاشاق» باعدارلاماسى ارقىلى شەتەلدەردە ءبىلىم العان جاس ماماندار دا بار دەدى گازەت تىلشىسىنە باتىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى حامي­دوللا يرمەنوۆ. ورال وڭىرىندەگى كوپ بەيىندى قالالىق اۋرۋحانا مىڭعا جۋىق ادامدى تۇراقتى جۇمىسپەن قامتىعان. تەمىر قۇسايىن, «ەگەمەن قازاقستان» ورال