مارقاكولدەي سۇلۋ ءوڭىردە تۋىپ, سۋرەتشى بولماۋ مۇمكىن ەمەس-اۋ. بىراق, بالا قابدىراحماننىڭ بالاۋسا قيالىن باۋراپ, سۋرەت ونەرىنە ەلىكتىرىپ جەتەلەگەن ءبىر قۇدىرەت قازاقتىڭ ەرتەگىلەرى مەن باتىرلار جىرى بولىپتى. اۋىل كىتاپحاناسى ءۇيىنىڭ تاپ قاسىندا. جارتى كىتاپحانانى ءبىر ءوزى تاۋىسىپ وقىعان شىعار. ەرتەگى-جىرلاردى باسىنا جاستاپ قويىپ وقيدى. كوزىنە ەلەستەتىپ, كىتاپتاعى سۋرەتتەرگە قاراپ قوبىلاندى مەن الپامىستىڭ, ەر توستىك پەن كەرقۇلا اتتى كەندەبايدىڭ, تازشا بالا مەن مىستان كەمپىردىڭ سۋرەتتەرىن سالادى. تاريحىمىزعا دەگەن اڭسار قۇمارلىق, حالقىمىزدىڭ جان دۇنيەسىنە, سالت-داستۇرىنە دەگەن زەيىن-ىنتا وسىلاي باستاۋ العان ەكەن.
ارمان-اڭسارى الماتى كوركەمسۋرەت ۋچيليشەسىنە الىپ كەلگەن. ودان سوڭ ش.ايمانوۆ اتىنداعى «قازاقفيلم» كينوستۋدياسىندا سۋرەتشى-مۋلتيپليكاتور بولىپ ىستەپ, «قاڭباق شال», «داستارقان», «كىشكەنتاي ورمەكشى», تاعى باسقا مۋلتفيلمدەردى جاساۋعا قاتىستى. ال ەندى وسى كينوستۋديا جولداماسىمەن ماسكەۋدە ۆگيك-ءتىڭ كينو سۋرەتشىلەرى فاكۋلتەتىندە وقىعان جىلدار ورەسىن ورلەتىپ, ساناسىن سەرپىلتە ءتۇسىپ ەدى.
ەلىمىز تاۋەلسىزدىك العان سوڭ تاريحي تاقىرىپقا جول اشىلدى. وسىناۋ بوس كەڭىستىكتى تولتىرۋعا ق.وتارباي دا قۇلشىنا كىرىستى. قازاق تاريحىنان ءوز تاقىرىبىن تاپتى, قىلقالاممەن وزىندىك كەسەك ويلارىن كەستەلەي ءبىلدى. تاريح قويناۋىنان, حالىق ومىرىنەن مارجان تەرگەن قابدىراحمان كارتينالارىنىڭ بوياۋلارى شىنشىل دا سىرشىل, تەرەڭ ويلى, جارقىن مۇڭدى بولىپ كەلەدى.
بۇگىندە اعا بۋىن سۋرەتشىلەر قاتارىنداعى قابدىراحمان وتارباي تۋىندىلارىنىڭ نەگىزگى تاقىرىبى قازاق تاريحىمەن ۇندەسىپ, سول تۇما بۇلاق كوزىنەن سۋىرتپاقتاپ سىر تارتۋىمەن تارتىمدى. مۇنى, اسىرەسە, ونىڭ «توبىلعى», «تۇركى», «قازاق حاندىعىنىڭ شاڭىراق كوتەرۋى», «اقبوز اتتى بۇعالىقتاۋ» سياقتى كارتينالارىنان كورىپ, كوزايىم بولارىمىز انىق.
ال سۋرەتشى قابدىراحماننىڭ جازۋشىلىعى بولەك اڭگىمە. جاي جازۋشى ەمەس, ساتيريك. ياعني, كوزمەرگەندىگىنە قوسا, سوزمەرگەن. «زامانداسىم ازانبەك» كارتيناسىنىڭ تاعدىرلى كەيىپكەرىنىڭ كوزىندەگى وت وسىناۋ تالانت يەسىنىڭ بولمىس-سيپاتىن تانىتىپ تۇرعانداي. ونەر زەرتتەۋشى قابىل حالىق ۇلى: «سۋرەتشى ەڭبەكتەرىندە بوياۋ, ماعىنا, ءپىشىن جانە پلاستيكالىق ەرەكشەلىكتەر بىرەگەي شەشىم تاپقان», دەسە, ءادىل باعا وسى.
قورعانبەك امانجول,
«ەگەمەن قازاقستان»
