قۋاتى ەڭ جوعارى كومپيۋتەر بيىل تانىستىرىلۋى مۇمكىن

قۋاتى 1 ەكسافلوپستى قۇرايتىن قىتايلىق سۋپەركومپيۋتەردىڭ ءپروتوتيپى وسى جىلدىڭ سوڭىنا تامان تانىستىرىلۋى مۇمكىن. بۇل تۋرالى ريا «نوۆوستي» اقپارات اگەنتتىگى حابارلادى. وتكەن جىلدىڭ قاراشا ايىندا قىتاي ماماندارى الەمدەگى قۋاتى كۇشتى كومپيۋتەردىڭ ءپروتوتيپىن جاساۋعا كىرىسكەنى بەلگىلى بولعان. قىتاي حالىق رەسپۋبليكاسىنىڭ ەسەپتەۋ تەحنيكا جانە تەحنولوگياسى ۇلتتىق زەرتتەۋ ورتالىعىنىڭ ينجەنەرى چجان تين كومپيۋتەردىڭ دايىن ەسەپتىك جۇيەسى تەك 2020 جىلى عانا شىعاتىنىن مالىمدەدى. ونىڭ ايتۋىنشا, بۇگىندە جەتەكشى مامانداردىڭ وڭ باعاسىنا يە بولعان Sunway TaihuLight-تەن ونىڭ كۇشى 200 ەسە جوعارى بولماق. وتكەن جىلدىڭ قاراشا ايىندا Sunway TaihuLight قۋاتى جوعارى 500 كومپيۋتەردىڭ رەيتينگىندە كەزەكتى رەت كوش باستادى. بۇعان دەيىن 2016 جىلدىڭ ماۋسىم ايىندا ءبىرىنشى ورىننان كورىنگەن. ونىڭ ەسەپتەۋىش جىلدامدىعى 93 پەتافلوپستى قۇرايدى. ماۋسىمداعى كورسەتكىشتە ەكىنشى ورىنعا تاعى ءبىر قىتايلىق «تيانحە-2» كومپيۋتەرى ورنالاستى. ونىڭ ەسەپتەۋىش جىلدامدىعى – 33,9 پەتافلوپس. ايتا كەتەيىك, Sunway TaihuLight 10,65 ميلليون يادرودان, 41 مىڭ تۇيىننەن تۇرادى. ال وسى جىلدىڭ سوڭىنا تامان ءپروتوتيپى تانىستىرىلاتىن كومپيۋتەر اسپاناستى ەلىنىڭ ەسەپتەۋ تەحنيكا جانە تەحنولوگياسى ۇلتتىق زەرتتەۋ ورتالىعى دايىنداپ جاتىر.