وتاندىق كينەماتوگرافتى قورعاۋ كەرەك - رۇستەم ءابدىراش

وتاندىق كينەماتوگرافتى قورعاۋ كەرەك. سەبەبى امەريكالىق فيلمدەردىڭ, سونداي-اق كورشى ەلدەردىڭ كينوەكسپانسياسى قاتتى. بۇل تۋرالى بۇگىن قر ۇكىمەت وتىرىسىندا «قازاق حاندىعى. الماس قىلىش» ءفيلمىنىڭ رەجيسسەرى رۇستەم ءابدىراش مالىمدەدى. "باسقا مەملەكەتتەر وعان توتەپ بەرىپ, زاڭدى تۇردە ءوز نارىعىن قورعاپ وتىر. بىزگە دە ءوز مۇددەمىزدى, ءوز تاريحىمىزدى, ءوز مادەنيەتىمىز بەن ءتىلىمىزدى قورعايتىن ۋاقىت كەلدى", دەدى رەجيسسەر. ونىڭ ويىنشا, كينوتەاترلاردا وتاندىق فيلمدەردى كورسەتۋ ۋاقىتىن زاڭمەن بەكىتىپ قويعان دۇرىس. ايتپەسە, بۇگىندە ونداي جەرلەردە قازاقتىڭ كينوسىن ىڭعايسىز ۋاقىتقا قويىپ وتىرادى ەكەن. «ونداي پروبلەما بۇرىننان بەرى بار. ماعان دا اقتاۋ, اتىراۋ, اقتوبە جاقتان وسى ماسەلە بويىنشا حابارلاسقاندار بولدى. ءبىز ديستريبيۋتورعا قوڭىراۋ شالدىق. بىراق ولاردىڭ ايتۋىنشا, ءفيلمنىڭ ۋاقىتىن كينوتەاترلاردىڭ وزدەرى قويادى. بۇل ماسەلە زاڭمەن رەتتەلمەگەن. ءبىر عانا تالاپ بار, بەس ادام بيلەت ساتىپ السا, ولار مىندەتتى تۇردە سول كينوسەانسقا كىرۋى ءتيىس. بىراق ۋاقىتىن كينوتەاتر بەلگىلەيدى. دەگەنمەن, ءدال وسى پروبلەمانى زاڭمەن بەكىتىپ العان ءجون. سول كەزدە كينوتەاترلاردان ءفيلمنىڭ ۋاقىتىن تالاپ ەتۋگە بولادى", دەيدى رۇستەم ءابدىراش.