2017 جىلى قىزىلوردا وبلىسىندا كاسىپكەرلەرگە 180 ملن تەڭگە نەسيە بەرىلەدى

شاعىن جانە ورتا كاسىپكەرلىك سۋبەكتىلەرىن ايماقتىق قارجىلاندىرۋ باعدارلاماسى اياسىندا 2016 جىلى 32 قىزىلوردالىق كاسىپكەرلەردىڭ جوبالارى جۇزەگە استى. باعدارلامانىڭ ءساتتى جۇمىس جاساۋى ناتيجەسىندە 175 جاڭا جۇمىس ورىندارى اشىلدى, دەپ حابارلادى «دامۋ» قورىنىڭ ءباسپاسوز قىزمەتى. بۇگىندە شاعىن جانە ورتا كاسىپكەرلىكتىڭ ەڭ باستى قاجەتتىلىگى – ول قارجىلاندىرۋ. سوندىقتان قىزىلوردا وبلىسىنىڭ اكىمدىگى مەن «دامۋ» قورى بىرلەسىپ شاعىن جانە ورتا بيزنەستى قولداۋعا 1,5 ملرد تەڭگە قاراجات بولگەن بولاتىن. وڭىرلىك باعدارلاما اياسىندا ايماقتىڭ كاسىپكەرلەرى 8,5% ۇستەمەمەن 180 ملن تەڭگەگە دەيىنگى نەسيە قاراجاتىن «قازاقستان حالىق بانكى» اق, «بانك تسەنتركرەديت» اق جانە «كازكوممەرتسبانك» اق سەكىلدى ەكىنشى دەڭگەيلى بانكتەردەن الۋعا بولاتىن بىرەگەي مۇمكىندىككە يە بولدى, شاعىن جانە ورتا كاسىپكەرلىك سۋبەكتىلەرىن ايماقتىق قارجىلاندىرۋ باعدارلاماسىنىڭ تيىمدىلىگىن پايدالانعان كاسىپكەرلەردىڭ ءبىرى - «سپورتماستەر سب» جشس كومپانياسىنىڭ ديرەكتورى باۋىرجان ماحمۋتوۆ. ول «بانك تسەنتركرەديت» اق ارقىلى 8,5% ۇستەمەمەن 20 ملن تەڭگە كولەمىندە العان نەسيە قاراجاتىن «اراي» مولتەك اۋدانىندا سپورتتىق كەشەن اشۋعا جۇمسادى. جاس ستارتاپشى نەسيە قاراجاتىنا قول جەتكىزۋ ماقساتىندا «دامۋ» قورىنىڭ بولشەك كەپىلدەندىرۋ باعدارلاماسىن دا پايدالاندى. ەسكەرە كەتسەك, وبلىس اكىمدىگى مەن قور اراسىندا 2017 جىلى ىنتىماقتاستىقتى جالعاستىرۋ تۋرالى مەموراندۋمعا قول قويىلعان بولاتىن. ۇستىمىزدەگى جىلى دا وڭىرلىك باعدارلاما اياسىندا كاسىپكەرلەر ءۇشىن 180 ملن تەڭگەگە دەيىن جەڭىلدەتىلگەن نەسيە قولجەتىمدى بولدى. نەگىزگى قۇرالدارى قايتا جاڭعىرتۋ ماقساتىنداعى نەسيەنى 60 ايعا دەيىن بەرىلسە, ال اينالىم قاراجاتىن تولتىرۋعا 36 ايعا دەيىن مەرزىمگە نەسيە الۋ مۇمكىندىگى قاراستىرىلعان. نەسيەنى كەپىلدەندىرۋ مولشەرى جەتىسپەگەن جاعدايدا كاسىپكەرلەر «بيزنەستىڭ جول كارتاسى 2020» بيزنەستى قولداۋ مەن دامىتۋدىڭ بىرىڭعاي باعدارلاماسى اياسىنداعى بولشەك كەپىلدەندىرۋ قۇرالىن پايدالانا الادى. كەپىلدەندىرۋ مولشەرى ارەكەت ەتۋشى كاسىپكەرلەر ءۇشىن 50%, ال باستاۋىش كاسىپكەرلەرگە – نەسيە سوماسىنىڭ 85% دەيىن قاراستىرىلعان.