استانادا جارىقتاندىرۋدىڭ «اقىلدى» جۇيەسى ىسكە قوسىلادى

استانادا جارىقتاندىرۋدىڭ «اقىلدى» جۇيەسى ىسكە قوسىلادى, دەپ حابارلادى ەلوردا اكىمدىگىنىڭ ءباسپاسوز قىزمەتى. استانا كوشەلەرىنىڭ ەرەكشە جوباسى "Astana Innovations" اق كومپانياسىمەن ازىرلەندى. جوبا جارىقديودتى شامدار ورناتۋ مەن كوشەنى جارىقتاندىرۋدىڭ «اقىلدى» جۇيەسىنە كوشۋ ارقىلى ەنەرگيا ۇنەمدەۋدى ارتتىرىپ, وعان جۇمسالاتىن شىعىنداردى ازايتۋدى كوزدەيدى. جوبا اياسىندا ناتري شامداردى زاماناۋي جارىقديودتى شامدارعا الماستىرۋ جوسپارلانعان. قۋاتتىلىعىن رەتتەۋگە بولاتىن شامداردىڭ جالپى سانى 25 مىڭنان كەم بولمايدى. جوباعا 4 ملرد تەڭگە كولەمىندە ينۆەستورلاردىڭ قارجىسى تارتىلماق. استانالىق كوممۋنالدىق شارۋاشىلىق باسقارماسى جەكە ارىپتەستەردى تارتۋ بويىنشا بايقاۋ جاريالاۋ ءۇشىن قاجەتتى قۇجاتتار ازىرلەۋدە. جوبا اۆتورلارى كوشەلەردى جارىقتاندىرۋعا جۇمسالاتىن ەلەكتر ەنەرگياسىن پايدالانۋدى شامامەن 50 پايىزعا ازايتىپ, اقىلدى جۇيەنىڭ كومەگىمەن شامداردى قولدانۋعا جۇمسالاتىن قاراجاتتى قىسقارتادى دەپ وتىر. سونداي-اق كوشەلەردى جارىقتاندىرۋ باعانالارىندا «زاتتار ينتەرنەتى (IoT)» «اقىلدى» سەرۆيسى ەنگىزىلمەك. بۇل سەرۆيستى ىسكە اسىرۋ وزگە ەسەپتەگىشتەردەن مالىمەتتەر جيناۋ ءۇشىن بىرىڭعاي  سىمسىز جۇيە, اقپاراتتىق كەستە, اۆاريالىق كومەك تۇيمەسى (SOS), فوتوبەينەتىركەۋ, كولىك قۇرالدارى اعىنىن مونيتورينگتەۋ, قورشاعان ورتانى مونيتورينگتەۋ جانە باقىلاۋ, Wi-Fi سىندى سەرۆيستەرگە قول جەتكىزۋگە مۇمكىندىك بەرەدى. وسىلايشا, قالانى جارىقتاندىرۋ مەن قوسىمشا سەرۆيستەر بۇل جوبانى Smart Astana جالپىقالالىق جوباسىنىڭ نەگىزگى باعىتتارىنىڭ ءبىرى ەتەرى ءسوزسىز. Astana innovations كومپانياسىنىڭ ماماندارىنىڭ ايتۋىنشا, جوبا بيىل ىسكە قوسىلادى. بايقاۋ قورىتىندىسى بويىنشا ينۆەستورمەن مەملەكەتتىك – جەكە مەنشىك ارىپتەستىك جونىندەگى كەلىسىم-شارتقا قول قويىلماق.