اقتوبە جولدارىن قاردان تازالاۋعا 910 ملن تەڭگە بولىنگەن

قىس مەزگىلىندە قالا جولدارىن كۇتىپ ۇستاۋعا جەرگىلىكتى اتقارۋشى بيلىك 910 ملن. تەڭگە ءبولدى. بۇل تۋرالى «اقتوبە اقپارات» ورتالىعىندا وتكەن ءباسپاسوز ماسليحاتىندا قالا اكىمىنىڭ ورىنباسارى ناعىمجان الدياروۆ مəلىمدەدى, دەپ جازادى قازاقپارات. - بيىل قىسقى كەزەڭدە جولداردى كۇتىپ ۇستاۋ ءۇشىن قالا بيۋدجەتىنەن 910 ملن. تەڭگە ءبولىنىپ جانە بارلىعى 14 ارنايى مەردىگەر, 260 بىرلىك تەحنيكا جۇمىلدىرىلدى. مەردىگەرلەر قىسقا دايىندىق كەزىندە جولداردا كوكتايعاق بولماۋ ماقساتىندا 1500 توننا قۇم ارالاس تۇز جانە 500 توننا تۇز ماتەريالدارى دايىنداپ, ولار وسى ۋاقىتتا سەبىلۋدە. قار شىعارۋ جانە دە قالا اۋماعىن قوقىستان, جاياۋ جۇرگىنشى جولىن تازارتۋ جۇمىستارى جۇرگىزىلۋدە, - دەدى ناعىمجان الدياروۆ. قازىر قالاداعى  30-دان استام كوشە تازارتىلعان. قار شىعارۋ جۇمىستارى سۋ تاسقىنىنا قارسى شارالاردىڭ ەڭ باستى باعىتى بولعاندىقتان, قاتاڭ باقىلاۋعا الىنعان. قىس مەزگىلىنىڭ باسىنان بەرى قالا كوشەلەرىنەن 120000 تەكشە مەتردەن استام قار قالا پوليگوندارىنا شىعارىلدى. سونىمەن قاتار, قالا اكىمى اپپاراتىنىڭ, مەملەكەتتىك مەكەمەلەردىڭ جانە كاسىپورىنداردىڭ جاۋاپتى قىزمەتكەرلەرىنەن قۇرالعان موبيلدىك توپ جۇمىس جاساۋدا.