استانانىڭ جاڭا تەمىرجول ۆوكزالىنا كولىك تۇراعى سالىنادى

جاڭا تەمىرجول ۆوكزالىندا مىڭنان استام اقىلى تۇراق ورىندارى اشىلادى. ۆوكزال بيىلعى مامىر ايىندا اشىلادى دەپ جوسپارلانعان, دەپ جازدى قازاقپارات. «استانا LRT» جشس كولىك بويىنشا ديرەكتورى رۋستام حاليلوۆتىڭ ايتۋىنشا, كوشە تۇراقتارىنان بولەك, مۇندا جۇزدەگەن اۆتوكولىككە ارنالعان پاركينگ عيماراتى بوي كوتەرەدى. جاڭا ۆوكزالدا ەسكى ۆوكزالداعى جاعداي قايتالانباۋى ءتيىس. «مۇگەدەكتەر مەن زاڭدى تاكسي تاسىمالداۋشىلارعا دا ورىن قاراستىرىلادى. ءبىز قوعامدىق كولىكتى تەكتەن-تەككە دامىتىپ جاتقان جوقپىز, سوندىقتان اۆتوبۋستارعا اۋىسىپ ءمىنۋ مۇمكىندىگى بولادى. اۆتوتۇراقتىڭ نەگىزگى مىندەتى ادامداردىڭ ءوز كولىگىن ۇزاق ۋاقىتقا تاستاپ كەتپەۋى بولماق. ماسەلەن, قازىرگى ۆوكزالدىڭ اۆتوتۇراعى اقىلى جۇيەگە اۋىستى», - دەدى حاليلوۆ. ونىڭ ايتۋىنشا, بۇرىندارى اۆتوتۇراقتىڭ 80-90 پايىزى لىق تولىپ, 10 پايىزى عانا بوس تۇراتىن. بۇگىندە كەپتەلىستىڭ قىزعان شاعىندا اۆتوتۇراقتىڭ 60-70 پايىزى عانا تولادى جانە بوس ورىن تابۋ مۇمكىندىگى كوبەيدى.