دۇنيەجۇزىلىك داۆوس ەكونوميكالىق فورۋمى باستالدى

دۇنيەجۇزىلىك ەكونمويكالىق فورۋمنىڭ جىل سايىنعى سەسسياسى بيىل 47-ءشى رەت ۇيىمداستىرىلىپ وتىر. داۆوستاعى ايتۋلى شاراعا بيىل 3 مىڭداي دەلەگات بارعان, دەپ جازادى فورۋمنىڭ رەسمي سايتى. شارا 17-20 قاڭتار ارالىعىندا ءوتىپ جاتىر. ءداستۇر بويىنشا شۆەيتساريانىڭ داۆوس قالاسىنا مەملەكەت جانە ۇكىمەت باسشىلارى, حالىقارالىق ۇيىم جەتەكشىلەرى مەن اتاقتى قوعام قايراتكەرلەرى قاتىسۋدا. فورۋمدى بيىل قحر توراعاسى سي تسزينپين اشتى. قىتاي دەلەگاتتارى بيىل سانى جاعىنان ەڭ كوپ ۇجىم بولىپ وتىر. وتكەن جىلى ەڭ كوپ وكىل اقش-تان بارعان ەدى. گەرمانيا اتىنان شاراعا انگەلا مەركەل باستاعان دەلەگاتتار مەن قورعانىس جانە قارجى مينيسترلەرى بارسا, فرانتسيا بۇل جولى تەك مينيسترلىك دەڭگەيىندەگى وكىلدەرىن جىبەرگەن. ال بريتانيادان تەرەزا مەيدىڭ ءوزى قاتىسۋدا. سونىمەن قاتار فورۋمعا پەتر پوروشەنكو مەن يلحام اليەۆ تە باردى. بيىلعى الەمدىك نارىقتا شيكىزات باعاسىن كوتەرۋدە ايتارلىقتاي ەڭبەگى سىڭگەن ساۋد ارابياسىنىڭ ەنەرگەتيكا ءمينيسترى حاليد ءال-فاليح تا كوپشىلىك نازارىندا. بۇلاردان بولەك حالىقارالىق ۆاليۋتا قورى باسشىسىكريستين لاگارد, Deutsche Bank, Credit Suisse, UBS, Barclays, HSBC, Bank of America قارجى ۇيىمدارى مەن Facebook, Alibaba Group, eBay, Wal-Mart, Total سەكىلدى ءىرى كاسىپورىنداردىڭ جەتەكشىلەرى قاتىسۋدا.