ۋنيۆەرسيادا 80 ەلگە ترانسلياتسيالانادى

28-ءشى بۇكىلالەمدىك قىسقى ۋنيۆەرسيادا ويىندارىن 80 ەل ترانسلياتسيالايدى. بۇل تۋرالى بۇگىن قر ۇكىمەت وتىرىسىندا ەلىمىزدىڭ اقپارات جانە كوممۋنيكاتسيالار ءمينيسترى داۋرەن اباەۆ مالىمدەدى. «ايتا كەتەتىن ماسەلە, قازاقستان ۋنيۆەرسيادانى وتكىزەتىن ەل بولعاندىقتان ترانسلياتسيالاۋ قۇقىعى وتاندىق تەلەارنالارعا تەگىن بەرىلەدى. تۇتاستاي العاندا, جارىستار 80 ەلگە  ترانسلياتسيالانىپ, 1 ملرد. اۋديتوريانى قامتيدى»,-  دەدى ول. ءمينيستردىڭ ايتۋىنشا, ۋنيۆەرسيادا ويىندارىنان 200-دەن استام تىكەلەي كورسەتىلىم ۇيىمداستىرىلادى. «ارينە, ەڭ باستى جۇمىس - جارىستى باستان-اياق ساپالى تۇردە ترانسلياتسيالاۋ. ەلىمىزدىڭ اۋماعىندا سپورت باسەكەسىن «حابار», «قازاقستان» جانە «قازسپورت» تەلەارنالارى تاراتادى. جالپى, 200-دەن استام ترانسلياتسيا ۇيىمداستىرىلاتىندىعى كوزدەلۋدە», - دەدى مينيستر. ونىڭ ايتۋىنشا, شارانىڭ رەسمي حوست تاراتۋشىسى رەتىندە حالىقارالىق ۋنيۆەرسيتەتتىك سپورت فەدەراتسياسى انىقتالعان. سونىمەن قاتار, اباەۆ ۋنيۆەرسيادانىڭ اشىلۋ جانە جابىلۋ شارالارى  مەن سپورتتىق جارىستاردىڭ كومەنتاتورلارى ىرىكتەپ الىنعانىن, تەلەارنالاردا جارىستارعا ارنالعان كۇندەلىكتەر كورسەتىلەتىندىگىن, ال گازەتتەردە ارنايى بەتتەر بەرىلەتىندىگىن ايتتى. «جىلدىڭ باستى سپورتتىق شاراسى اياقتالعاننان كەيىن ۋنيۆەرسيادانى وتكىزۋ تۋرالى رەسمي فيلم ءتۇسىرۋ ۇيىمداستىرىلاتىن بولادى», - دەدى مينيستر. ەستەرىڭىزگە سالا كەتسەك, 28-ءشى بۇكىلالەمدىك قىسقى ۋنيۆەرسيادا ويىندارى 2017 جىلدىڭ 28 قاڭتارى مەن 8 اقپانى ارالىعىندا الماتى قالاسىندا وتەدى.