ساعىنتاەۆ: ۋنيۆەرسيادا - ەلىمىزدىڭ ابىروي-بەدەلىنە قاتىسى بار ماڭىزدى شارا

ۋنيۆەرسيادا ءىرى سپورتتىق سايىس قانا ەمەس, سونىمەن بىرگە ەلىمىزدىڭ ابىروي-بەدەلىنە قاتىسى بار ماڭىزدى شارا. بۇل تۋرالى بۇگىن ۇكىمەت وتىرىسىندا پرەمەر-مينيستر باقىتجان ساعىنتاەۆ مالىمدەدى. «بۇگىنگى باياندامالاردان بىلگەنىمىز, الماتى قالاسى بۇكىلالەمدىك قىسقى ۋنيۆەرسيادا ويىندارىن وتكىزۋگە نەگىزىنەن دايىن. ۋنيۆەرسيادا ءىرى سپورتتىق سايىس قانا ەمەس, سونىمەن بىرگە ەلىمىزدىڭ ابىروي-بەدەلىنە قاتىسى بار ماڭىزدى شارا. سول سەبەپتەن دە الماتى قالاسى اكىمدىگى قابىلداپ جاتقان كەيبىر ماسەلەلەرگە الماتىلىقتار تۇسىنىستىكپەن قارايدى دەپ ويلايمىن. ول ەندى ۋاقىتشا عانا كەمشىلىكتەر بولۋى مۇمكىن», - دەدى ۇكىمەت باسشىسى. ول سپورت دوداسىنىڭ جوعارى دەڭگەيدە وتۋىنە ءبارىمىز اتسالىسۋىمىز قاجەتتىگىن اتاپ ءوتتى. سونىمەن قاتار پرەمەر-مينيستر بىرقاتار ناقتى تاپسىرمالار بەردى. «الماتى قالاسىنىڭ اكىمدىگى ينۆەستيتسيالار جانە دامۋ مينيسترلىگىمەن جانە وزگە دە مۇددەلى مەملەكەتتىك ورگاندارمەن بىرگە كولىكتىك-لوگيستيكا ماسەلەلەرىن, ۋنيۆەرسيادانىڭ جاڭا نىساندارىنىڭ قاۋىپسىزدىك تالاپتارى مەن ستاندارتتارىنا ساي جۇمىس ىستەۋىن تاعى ءبىر تىڭعىلىقتى پىسىقتاۋى ءتيىس. ىشكى ىستەر مينيسترلىگى ادامدار جاپپاي جينالاتىن نىساندارداعى, قوناق ۇيلەر مەن قوعامدىق ورىندارداعى, قوعامدىق كولىكتەردەگى ءورت قاۋىپسىزدىگى جاي-كۇيىنە باقىلاۋدى كۇشەيتۋى قاجەت. جالپى, ءىىم-گە قوعامدىق ءتارتىپتى قامتاماسىز ەتۋدى تاپسىرامىن», - دەدى ساعىنتاەۆ. ۇكىمەت باسشىسى اقپارات جانە كوممۋنيكاتسيالار مينيسترلىگىنە اقپاراتتىق-يميدجدىك جۇمىستارعا باسا نازار اۋدارۋدى جۇكتەدى. ال دەنساۋلىق ساقتاۋ جانە الەۋمەتتىك دامۋ مينيسترلىگىنە ۋنيۆەرسيادا كەزىندە مەديتسينالىق قىزمەت كورسەتۋگە ايرىقشا ءمان بەرۋ تاپسىرىلدى.