ۋنيۆەرسيادا نىساندارى تەررورلىق قاۋىپسىزدىك بويىنشا ەرەكشە باقىلاۋدا بولادى

قر ىشكى ىستەر مينيسترلىگى ۋنيۆەرسيادا نىساندارىن تەررورلىق قاۋىپسىزدىك بويىنشا ەرەكشە باقىلاۋدا ۇستايدى. بۇل تۋرالى بۇگىن ۇكىمەت وتىرىسىندا ۆەدومستۆا باسشىسى قالمۇحانبەت قاسىموۆ مالىمدەدى. "ۋنيۆەرسيادانىڭ توعىز نىسانىن تەررورلىق جانە ەكسترەميستىك قاتەردەن ساقتاۋ ءۇشىن ەرەكشە باقىلاۋدا ۇستايمىز. نىسانداردا راديواكتيۆتى جانە حيميالىق زاتتاردىڭ بار-جوعى تەكسەرىلىپ, ءورت قاۋىپسىزدىگى ەرەجەلەرى ساقتالادى. ارنايى تەكسەرەتىن قۇرىلعىلار كۇنى-ءتۇنى ىستەيدى. 96 وتكىزۋ جانە 27 رەنتگەندىك قۇرىلعى قويىلدى. ەكى مىڭنان استام كامەراسى بار باقىلاۋ جۇيەسى ورناتىلدى", - دەدى مينيستر. "اتلەتيكالىق اۋىلدا قاۋىپسىزدىكتى قامتاماسىز ەتۋ ءۇشىن قۇقىق قورعاۋ قىزمەتكەرلەرىمەن قاتار وزگە دە ءتيىستى ورگان جۇمىسى ۇيىمداستىرىلدى", - دەدى قاسىموۆ. سونىمەن قاتار الدىن الا سىناق جۇمىستارى ۇيىمداستىرىلىپ, قىزمەتكەرلەردى ورنالاستىرۋ ءتارتىبى بەكىتىلدى. وسى ماقساتتا, ءمينيستردىڭ ايتۋىنشا, 7,5 قىزمەتكەر جۇمىس ىستەيدى. ونىڭ 4700-ءى پوليتسيا قىزمەتكەرلەرى بولسا, 1 مىڭ اسكەري قىزمەتكەر, 1400 قورعانىس مينيسترلىگى قىزمەتكەرى مەن 150 كينولوگ جۇمىس ىستەيدى.