الماتى وبلىسىندا ءسۇت-تاۋارلى فەرما سالىنۋدا

الماتى وبلىسىنىڭ قاراقىستاق اۋىلىندا جىلىنا 6 مىڭ توننا ءسۇت وندىرەتىن فەرما سالىنىپ جاتىر. بۇل تۋرالى جامبىل اۋدانىنىڭ اكىمى جانداربەك دالاباەۆ ءوزىنىڭ تۇرعىندار الدىندا بيىلعى جىلعى العاشقى ەسەپ بەرۋ جيىنىندا ايتتى. الماتى وبلىسى جامبىل اۋدانىندا «100 ناقتى قادام» ۇلت جوسپارىنىڭ 60 جانە 61 قادامدارىندا ءسۇت پەن ەت ءوندىرىسىن دامىتۋ جونىندە تاپسىرمالاردى ورىنداۋ باعىتىندا جۇيەلى جۇمىستار جاسالىپ كەلەدى. وتكەن جىلى 21 مىڭ 913 توننا ەت, 39 مىڭ 668 توننا ءسۇت ءوندىرىلىپ, جوسپاردى اسىرا ورىندادى. ج. دالاباەۆتىڭ ايتۋىنشا, وڭىردەگى 3 مىڭ باسقا ارنالعان «يمپەريا فۋد» جشس-نىڭ مال سانىن الداعى ۋاقىتتا 10 مىڭعا دەيىن ارتتىرۋ كوزدەلۋدە. وعان قوسا قۋاتتىلىعى 5000 توننالىق, جالپى قۇنى 288 ملن. تەڭگەلىك استىق قويماسىن سالۋ جۇمىستارى جۇرگىزىلۋدە. ونىڭ 224 ملن. تەڭگەسى - «كازاگروفينانس» اق-نىڭ, 64 ملن. تەڭگەسى - كومپانيانىڭ ءوز قارجىسى. سونىمەن قاتار اۋداننىڭ قاراقىستاق اۋىلىنداعى «تابىس» شارۋا قوجالىعى 600 باسقا ارنالعان, جالپى قۇنى 1 ملرد. 780 ميلليون تەڭگە تۇراتىن  ءسۇت- تاۋارلى فەرماسىن سالىپ, ۋكراينادان اسىل تۇقىمدى سيىر مالىن ساتىپ الۋ جۇمىستارىن جۇرگىزۋدە. شارۋاشىلىق تولىق قۋاتىمەن جۇمىس ىستەگەندە جىلىنا 6,0 مىڭ توننا ءسۇت وندىرەتىن بولادى. وسىعان بايلانىستى اتالعان كاسىپورىن قۋاتتىلىعى 5,0 مىڭ توننالىق ءسۇت وڭدەۋ زاۋىتىن سالۋ جۇمىسىن قولعا الدى.