ۋنيۆەرسيادا قارساڭىندا جاڭارتىلعان ناۆيگاتسيا جۇيەسى ەنگىزىلدى

الماتىدا 2017 جىلعى دۇنيەجۇزىلىك قىسقى ۋنيۆەرسيادا قارساڭىندا قوسىمشا 300-دەن استام اقپاراتتىق-كورسەتكىش جول بەلگىلەرى ورناتىلعان, دەپ جازادى ۋنيۆەرسيادانىڭ رەسمي سايتى. ۋنيۆەرسيادا ديرەكتسياسى حابارلاعانداي, سپورت نىساندارى جانە ولارعا كولىك قوزعالىسىنىڭ باعدارلارى تۋرالى اقپارات جەكە جوبالاۋ بەلگىلەرىندە قازاق, ورىس جانە اعىلشىن تىلدەرىندە كورسەتىلگەن. جول بەلگىلەرىنىڭ ديزاينى وتكىزىلەتىن جارىس تۇرلەرى بويىنشا سپورت نىساندارىنىڭ باعدارلامالارى مەن جارىستاردىڭ بەكىتىلگەن لوگوتيپىن قامتيدى. باعدار بويىنشا بەيىمدەلۋ بەلگىلەرى سپورت قۇرىلىستارىنا, كولىك ينفراقۇرىلىمى نىساندارىنا (ت/ج ۆوكزالدارى جانە «الماتى» حالىقارالىق اۋەجايى), ۋنيۆەرسيادا سپورتشىلارى مەن قوناقتارى دەمالاتىن جانە تۇراتىن ورىندارعا ءوتۋدىڭ وڭتايلى باعدارلارىندا ورنالاسقان. سونداي-اق ناۆيگاتسيا جۇيەسىنە الماتى قالاسىنىڭ مەديتسينالىق مەكەمەلەرى كىردى. بولجامدارعا سايكەس, ۋنيۆەرسياداعا قاتىسۋشىلاردىڭ 90%-ى الماتى قالاسىنىڭ حالىقارالىق اۋەجايىنا تىكەلەي اۋە رەيستەرىمەن كەلەدى. بۇدان بولەك, قاۋىپسىزدىكتى قامتاماسىز ەتۋ ءۇشىن, مومىش ۇلى كوشەسىندە, «الماتى ارەنا» سپورت كەشەنىنىڭ وڭتۇستىگىنە قاراي باعدارشام نىسانى ورناتىلعان. «الماتى ارەنا» سپورت نىسانىنىڭ سولتۇستىگىنە قاراي بوس ورىنداردىڭ بار ەكەنى تۋرالى اقپاراتتاندىراتىن ەلەكتروندى تابلومەن جاراقتاندىرىلعان قوسىمشا اۆتوتۇراق دايىندالعان.