ۇلتتىق بانك كريپتوۆاليۋتاعا قاتىستى ەسكەرتۋ جاريالادى

قر ۇلتتىق بانكى كريپتوۆاليۋتالاردى پايدالانا وتىرىپ حالىققا ينۆەستيتسيالىق قىزمەت كورسەتەتىن ۇيىمداردىڭ قىزمەتىن رەتتەمەيدى. بۇل تۋرالى قازاقپارات حابارلادى. «قر ۇلتتىق بانكى قازىرگى ۋاقىتتا قازاقستاندا كريپتوۆاليۋتالاردى پايدالانا وتىرىپ حالىققا ينۆەستيتسيالىق قىزمەت كورسەتەتىن ۇيىمداردىڭ جۇمىس ىستەيتىندىگىن حابارلايدى. بۇل ۇيىمدار قازاقستاندىقتارعا كريپتوۆاليۋتالاردى ساتىپ الۋ ماقساتىندا قولما-قول اقشا ەنگىزۋ جولىمەن, سول سياقتى قولما-قول اقشاسىز تارتىپپەن ينتەرنەت جەلىسى ارقىلى ولاردىڭ باعدارلامالارىنا قاتىسۋدى ۇسىنادى», – دەلىنگەن حابارلامادا. بۇل ۇيىمداردىڭ وكىلدەرى ساتىپ العان كريپتوۆاليۋتالار بويىنشا جەكە تۇلعا كليەنتتەرگە قارجى نارىعىنداعى قولدانىستاعى مولشەرلەمەلەرمەن سالىستىرۋعا كەلمەيتىن, بەلگىلى ءبىر ۋاقىت وتكەننەن كەيىن جوعارى كىرىستەردى (تىم ارتىق پايىزدار) ۋادە ەتەدى. جوعارى سىياقىلار اينالىمداعى اقشانىڭ بولۋىن قامتاماسىز ەتە وتىرىپ, قاتىسۋشىلاردىڭ ايتارلىقتاي سانىن جانە جاڭا كليەنتتەردىڭ اقشالاي تۇسىمدەرىن تارتۋ ەسەبىنەن تولەنەدى. اقشا اينالىمى (اعىنى) توقتاتىلعان نەمەسە جەتىسپەگەن كەزدە اعىمداعى مىندەتتەمەلەردى وتەۋ ءۇشىن بۇل ۇيىمدار جابىلىپ, بارلىق تولەمدەر توقتاتىلادى. «كريپتوۆاليۋتالاردىڭ رەسمي اقشا بىرلىگىنە نە وزگە دە ناقتى اكتيۆتەرگە بايلانىسى, سونداي-اق ءتيىستى قامتاماسىز ەتۋى جانە ولارعا قىزمەت كورسەتۋ وپەراتسيالارى بويىنشا زاڭ تۇرعىسىنان جاۋاپتى سۋبەكتىلەرگە قاتىسى جوق. بۇدان باسقا, كريپتوۆاليۋتالاردىڭ اينالىس پروتسەسى ورتالىقتاندىرىلماعان, جانە ونى رەتتەۋ مۇمكىندىگى جوق», – دەلىنگەن ۆەدومستۆونىڭ ءباسپاسوز قىزمەتى. بۇل رەتتە وسى ۇيىمداردىڭ پايداسىنا اقشا ەنگىزگەن قاتىسۋشىلاردىڭ سالىنعان اقشانى قايتارۋىنىڭ قۇقىقتىق كەپىلدىكتەرى جوق, سەبەبى قازاقستان رەسپۋبليكاسىنىڭ ازاماتتىق زاڭناماسىنا سايكەس بۇل ۇيىمعا كىرۋ جانە جەكە تۇلعالاردىڭ اقشا ەنگىزۋى ەرىكتى نەگىزدە جۇزەگە اسىرىلادى جانە ول قانداي دا بولماسىن قۇجاتتاندىرىلعان راسىمدەرمەن بەكىتىلمەيدى.