قىلمىستىق ىستەردى ونلاين رەجىمدە تەرگەۋگە جول اشىلادى

بۇگىن قر جوعارعى سوتىندا «زاڭدىلىق» اقپاراتتىق-تالدامالىق جۇيەسىنىڭ جوباسى تانىستىرىلدى. اتالعان جۇيە قىلمىستىق ىستەردى ونلاين رەجىمدە تەرگەۋگە جول اشادى. «ەندىگى كەزەك قىلمىستىق ءىس جۇرگىزۋدى تولىقتاي اقپاراتتاندىرۋدا تۇر. وسى ماقساتتا بۇگىن سوت پەن پروكۋراتۋرانىڭ «زاڭدىلىق» اقپاراتتىق-تالدامالىق جۇيەسىنىڭ جوباسىن تانىستىرىپ وتىرمىز. بۇل جۇيەنى ءوندىرۋدىڭ باستى ماقساتى قىلمىستىق پروتسەسكە «اقىلدى» تەحنولوگيالاردى ەنگىزۋدىڭ كەزەكتى قادامىنا ارنالعان», - دەپ توقتالدى قر جوعارعى سوتىنىڭ توراعاسى قايرات ءمامي. وسى ورايدا ول جاڭا ەلەكتروندى قىزمەتتەردىڭ ارقاسىندا ازاماتتار سوت ساتىلارى بويىنشا ارتىق جۇگىرىستەن قۇتقارىلعانىن اتاپ ءوتتى. «وتكەن جىلى «سوت كابينەتى» ارقىلى سوتتارعا 756 مىڭنان استام ەلەكتروندى قۇجات كەلىپ ءتۇستى. ءبىزدىڭ باستى تالابىمىز - تۇرعىندار ءۇشىن جەڭىل ءارى ىڭعايلى تەتىكتەردى قۇرۋ», - دەدى ول. «زاڭدىلىق» جوباسىنىڭ ماقساتى - سوتقا دەيىنگى تەرگەپ-تەكسەرۋدىڭ بىرىڭعاي ءتىزىلىمى مەن سوت ورگاندارىنىڭ «تورەلىك» اقپاراتتىق-تالدامالىق جۇيەسىن ينتەگراتسيالاۋ ەسەبىنەن قىلمىستىق ۇدەرىستىڭ ساپاسى ارتتىرۋ. سونىمەن قاتار بۇل باعىتتا قىلمىستىق ىستەردى تەرگەۋ مەن سوتتا قاراۋ بارىسىنداعى ۇدەرىسكە قاتىسۋشىلاردىڭ زاڭ بۇزۋشىلىق بويىنشا شاعىمدارىن ازايتۋعا نەگىزدەلگەن. «زاڭدىلىق»جوباسى پروكۋرورلاردىڭ, سوتتاردىڭ كەمشىلىكتەرىن دەر كەزىندە انىقتاۋعا مۇمكىندىك بەرەدى. سونداي-اق قاتەلىكتەردى جويۋعا ىقپال ەتەدى. جۇيە اياسىندا ەش پايداسى جوق قاعاز اينالىمىنان قۇتىلۋعا جاعداي جاسالماق. سونىمەن قاتار جۇيەنى ەنگىزگەننەن كەيىن قارجىلىق جانە وزگە دە كۇردەلى ىستەردەن باسقالارى 2-3 كۇن تەرگەلەتىن بولادى. ال قازىر قىلمىستىق ءىستى تەرگەۋدىڭ ورتاشا مەرزىمى 2-3 ايدى قۇرايدى. بىرقاتار ۇيىمداستىرۋشىلىق راسىمدەر اياقتالعان سوڭ, جوبا 2017 جىلدىڭ شىلدەسىندە قولدانىسقا ەنگىزىلمەك.