سەربيادا قازاقستاندىق بوكسشى قىزدار ءبىرىنشى ورىن الدى

سەربيادا وتكەن بوكستان ءداستۇرلى ۇلت كۋبوگىندا قازاقستاننىڭ قىزدار كومانداسى جالپى ەسەپتە ءبىرىنشى ورىن يەلەندى. قازاق قىزدارى 6 التىن, 2 كۇمىس, 4 قولا مەدال ەنشىلەدى, دەپ حابارلادى قر بوكس فەدەراتسياسىنىڭ ءباسپاسوز قىزمەتى. سەربيا حالىقارالىق تۋرنيرىندە الەم چەمپيونى دينا جولامان (54 كەلى), ۆالەنتينا حالزوۆا (69) ءلاززات كۇنگەيباەۆا (+81), ريمما ۆولوسەنكو (60), داريعا شاكىموۆا (75) جانە فاريزا شولتاي (81) جەڭىمپاز اتاندى. ايتا كەتەرلىگى, بۇل تۋرنيردە ءبىزدىڭ سپورتشىلارىمىز قارسىلاستارىنان ايقىن باسىم ءتۇستى. ءتىپتى, فينالدىق كەزدەسۋدە ەكى قازاقستان سپورتشىسىنىڭ كەزدەسكەن كەزدەرى دە بولدى. اتاپ ايتقاندا, 54 كەلىدە فينالدىق كەزدەسۋدە جولامان مەن تۇياقباي, ال 81 كەلىگە دەيىن سالماق ساناتىندا شولتاي مەن ماماتقۇلوۆا التىن مەدال ءۇشىن ايقاستى. «بۇل تۋرنير جىل باسىنداعى ءداستۇرلى بوي جازۋ سانالادى. قىزدار جامان كورسەتكىش كورسەتكەن جوق. ولار تۋرنيردەن تۋرنيرگە وتكەن سايىن جاقسى تاجىريبە جيناپ, وزدەرىنىڭ دايىندىقتارىن شىڭداي تۇسەدى دەپ ويلايمىن. سەربيا ءتۋرنيرى وسى جىلعى العاشقى جارىس جانە بىزدەرگە قالاي جۇمىس ىستەۋ قاجەتتىگىن كورۋ قاجەت. بۇل نەگىزگى جارىستار الدىنداعى تەكسەرۋ دەسەك تە بولادى. 2017 جىلى ءبىز قىزدار قۇراماسى ءۇشىن ماڭىزدى 17 حالىقارالىق تۋرنيرگە جانە قازاقستان چەمپيوناتى مەن ۆەتنامدا قازان ايىندا وتەتىن ازيا چەمپيوناتىنا قاتىسامىز», - دەدى قىزدار قۇراماسىنىڭ اعا جاتتىقتىرۋشىسى ۆاديم پريسياجنيۋك.