سالىق تولەمەيتىندەرگە جازانى قاتاڭداتۋ قاجەت - سابيليانوۆ

سالىق تولەمەيتىندەرگە جازانى قاتاڭداتۋ قاجەت. بۇل تۋرالى بۇگىن قر پارلامەنتى ماجىلىسىندە "سالىقتىق جانە كەدەندىك اكىمشىلەندىرۋدى جەتىلدىرۋ" تاقىرىبىنداعى ۇكىمەت ساعاتىندا دەپۋتات نۇرتاي سابيليانوۆ ايتتى. «ەشكىمگە جاسىرىن ەمەس, قازىر مەملەكەتتىڭ قارجىسىن تالان-تاراجعا ءتۇسىرۋ ءۇشىن كوپتەگەن كاسىپورىن جالعان كاسىپكەرلىككە جۇگىنەدى نەمەسە سالىقتان جالتارۋ ءۇشىن كاسىپكەرلىك سۋبەكتىلەرى وسى جالعان كاسىپكەرلىك ارقىلى قولما-قول اقشالارىن شىعارىپ الادى. وسىعان بايلانىستى سۇراعىم, 2015-2016 جىلدارى قانشا قاراجات جالعان كاسىپكەرلىك ارقىلى اينالىمدا بولدى؟ وسىعان سىزدەردىڭ تاراپتارىڭىزدان قانداي شارالار قولدانىلادى؟ جالپى, قىلمىستىق كودەكستىڭ 2015-ءشى بابىن ارى قاراي دا قاتاڭداتۋ قاجەت شىعار. سالىق تولەمەيتىندەرگە جازانى قاتاڭداتۋ قاجەت», - دەدى ول قارجى ءمينيسترى باقىت سۇلتانوۆقا قاراتا. ءوز كەزەگىندە سۇلتانوۆ قىلمىستىق كودەكستىڭ ءتيىستى بابىن وزگەرتۋ تۋرالى ءبىراز ماسەلە كوتەرىلىپ جاتقانىن اتاپ ءوتتى. «ءبىز ونى قازىر قىزۋ تالقىلاۋ ۇستىندەمىز. باس پروكۋراتۋرامەن بىرگە ارنايى جۇمىس توبى جۇمىس ىستەۋدە. جازانى قاتاڭداتۋمەن كەلىسەمىز», - دەگەن مينيستر.