گولوۆكين: دجەيكوبس ورتا سالماقتاعى ۇزدىكتەردىڭ ءبىرى

قازاقستاندىق بوكسشى گەننادي گولوۆكين (36-0, 33 كو) دەننيەل دجەيكوبسپەن وتەتىن جەكپە-جەگى تۋرالى ءوز ويىمەن ءبولىستى. بۇل تۋرالى vesti.kz حابارلادى. ول ءوزىنىڭ قارسىلاسىن ورتا سالماقتاعى چەمپيون دەپ اتاپ, ونىڭ كۇشى مەن جىلدامدىعىنا دا اسا ءمان بەرۋ كەرەكتىگىن ايتتى. «ءبارى ۇلكەن نوكاۋتتى كۇتىپ ءجۇر. بوكس بولعاندىقتان مەن ۇلكەن درامالىق شوۋدى ۇناتامىن. دجەيكوبستىڭ چەمپيون جانە ورتا سالماقتاعى ۇزدىكتەردىڭ ءبىرى ەكەنىن جاقسى بىلەمىن. ونىڭ تاجىريبەسى دە مول. ال جىلدامدىعى مەن كۇشى ءوز الدىنا بولەك اڭگىمە», – دەدى گولوۆكين. بۇعان دەيىن دجەيكوبس قازاقستاندىق سپورتشىدان جاسقانبايتىنىن ايتىپ, جەڭىسكە جەتۋ ءۇشىن قولىنان كەلگەننىڭ ءبارىن جاسايتىنىن, سونداي-اق بارلىق بەلبەۋىن تارتىپ الۋعا قاۋقارلى ەكەنىن مالىمدەدى. ايتا كەتەيىك, قوس بوكسشىنىڭ اراسىنداعى جەكپە-جەك 18 ناۋرىز كۇنى نيۋ-يورك قالاسىنداعى Madison Square Garden ارەناسىندا وتەدى.