نيجات راحيموۆ الەمنىڭ ۇزدىك اۋىر اتلەتى اتاعىنا ۇسىنىلدى

قازاقستاندىق نيجات راحيموۆ 2016 جىلعى الەمنىڭ ۇزدىك اۋىر اتلەتى اتاعىنا ۇسىنىلدى. بۇل تۋرالى vesti.kz حابارلادى. حالىقارالىق اۋىر اتلەتيكا فەدەراتسياسى (IWF) تابىستايتىن سىيلىققا جەتى زىلتەمىرشى ۇمىتكەر اتانىپ وتىر. وتكەن جازدا ونىڭ ءبارى ريو وليمپياداسىندا توپ جارعان. ولار: كولۋمبيالىق وسكار فيگەروا (62 كگ دەيىن), قىتايلىق لۋن تسينتسيۋان (56 كگ دەيىن), يراندىق كيران روستامي (85 كگ دەيىن), وزبەكستاندىق رۋسلان نۋرۋتدينوۆ (105 كگ دەيىن) جانە گرۋزيالىق لاشا تالاحادزە (105 كگ جوعارى). داۋىس بەرۋ اتالعان فەدەراتسيانىڭ رەسمي سايتىندا 31 قاڭتارعا دەيىن جۇرگىزىلەدى. وليمپيادادا 77 كيلو سالماقتا نيجات راحيموۆ جۇلقا كوتەرۋدەن الەمدىك رەكورد ورناتقان. ەكى جاتتىعۋدىڭ قورىتىندىسىندا ول 379 كيلونى (165+214) كوتەردى. ايتا كەتەيىك, 23 جاستاعى سپورتشى باكۋ قالاسىندا تۋعان. 2013 جىلدىڭ جازىنا دەيىن ازەربايجان قۇراماسىندا زىلتەمىر كوتەرگەن. الايدا, دوپينگ داۋىنا بايلانىستى ەكى جىلدىق ديسكۆاليفيكاتسيا الىپ, ءوز قۇراماسىنان كەتۋگە ءماجبۇر بولدى. ال 2014 جىلدىڭ تامىز ايىندا قازاقستان ازاماتتىعىن الىپ, 2015 جىلدان باستاپ جارىستارعا قاتىسا باستادى. ءدال وسى جىلى الەم چەمپيونى اتانىپ ۇلگەردى. وڭىرلىك دەڭگەيدە اتىراۋ وبلىسىنىڭ اتىنان قاتىسادى.