ماكسيموۆيچ: «استانادا» ءالى جارتى جىل قالۋىم مۇمكىن

«استانا» فۋتبول كومانداسىنىڭ جارتىلاي قورعاۋشىسى نەمانيا ماكسيموۆيچ ەلوردادا جارتى جىل قالۋى مۇمكىن ەكەندىگىن ايتتى. بۇل تۋرالى vesti.kz حابارلادى. سەربيا ۇلتتىق قۇراماسىنىڭ ويىنشىسى 9 قاڭتار كۇنى يسپانيانىڭ «ۆالەنسيا» كومانداسىمەن 2021 جىلدىڭ جازىنا دەيىن الدىن الا كەلىسىمشارت جاساسقان. ال «جارقاناتتار» ماكسيموۆيچتىڭ ترانسفەرى ءۇشىن 300 مىڭ ەۋرو تولەۋگە ءازىر بولعان. الايدا, قازاقستاندىق كوماندامەن ورتاق كەلىسىمگە كەلە الماعان سىڭايلى. بۇل ءوز كەزەگىندە سەربتىڭ جاڭا كومانداسىنا تەك وسى جىلدىڭ جازىندا عانا قوسىلاتىندىعىن بىلدىرەدى. «ەگەر قازىرگى جاعدايعا قارايتىن بولساق, «استانادا» ءالى جارتى جىل قالاتىن سياقتىمىن. الداعى كۇندەرى دۋبايدا ءوتىپ جاتقان وقۋ-جاتتىعۋ جيىنىنا قوسىلامىن», – دەدى نەمانيا. العاشىندا ول دۋبايعا باراتىنداردىڭ قاتارىنا قوسىلماعان. وقۋ-جاتتىعۋ جيىنى كەشە, ياعني 15 قاڭتاردا باستالدى. مۇندا ەلوردالىقتار ەكى جولداستىق كەزدەسۋ وتكىزەدى. ايتا كەتەيىك, ماكسيموۆيچتىڭ «استانامەن» كەلىسىمشارتى وسى جىلدىڭ ماۋسىم ايىندا اياقتالادى.