2017 جىلى قىزىلوردا وبلىسىندا 44 كوپقاباتتى ءۇي سالىنادى

قىزىلوردا وبلىسىندا وتكەن جىلى 80 كوپقاباتتى ءۇيدىڭ قۇرىلىسى جۇرگىزىلىپ, ونىڭ 510,6 مىڭ شارشى مەترى پايدالانۋعا بەرىلدى. بۇل جايىندا وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى مۇحامەديسا السەرىكوۆ ءمالىم ەتتى. باسقارما باسشىسىنىڭ ايتۋىنشا وتكەن جىلعا جوسپارلانعان جۇمىستار تولىعىمەن ورىندالدى. بىلتىر الەۋمەتتىك نىساندار مەن تۇرعىن ۇيلەر سالۋعا, ينجەنەرلىك-ينفراقۇرىلىم جاساقتاۋعا 38,7 ملرد تەڭگە بولىنگەن.  اتالعان كەزەڭدە سالىنىپ جاتقان 48 نىساننىڭ 25-ءى پايدالانۋعا بەرىلدى.  ءبىلىم سالاسىندا قۇرىلىسى ءجۇرىپ جاتقان 22 نىساننىڭ تورتەۋى اياقتالدى. - ەندىگى مىندەت قالعان نىسانداردى سالىپ ءبىتىرۋ. سونىمەن قاتار, بيىل ايماقتا سپورتتى دامىتۋ باستاماسى اياسىندا  ع. مۇراتباەۆ اتىنداعى ستاديوننىڭ قوسالقى الاڭى مەن اۋدانداعى سپورت كەشەندەرى رەكونسترۋكتسيالانادى. بيىلعى باستى جاڭالىق - تۇرعىن ءۇي قۇرىلىسى «نۇرلى جول» باعدارلاماسىنىڭ شەڭبەرىندە جۇرگىزىلەدى. وسى باعدارلاما اياسىندا بيىل وبلىس بويىنشا جالپى اۋماعى 151 مىڭ شارشىمەتردى قۇرايتىن 44 كوپقاباتتى ءۇي سالۋ جوسپارلانۋدا, - دەدى باسقارما باسشىسى.