اتلەتتەر اۋىلى

الماتىدا 29 قاڭتار مەن 8 اقپان ارالىعىندا وتەتىن XXVIII قىسقى ۋنيۆەر­سيا­دانىڭ  5 مىڭ كورەرمەنگە ارنالعان اتلەتيكالىق اۋىلى پايدا بولعالى دا ءبىرشاما ۋاقىت ءوتتى. ول الاتاۋ اۋدانىندا باۋىرجان مومىش ۇلى كوشەسىنىڭ بويىن­دا, رايىمبەك داڭعىلىنىڭ سولتۇستىك جاعىندا ورنالاسقان. وسىنداعى مۇز سارا­يى­نىڭ جانىندا قانات جايعان ونىڭ جالپى جەر كولەمى 21,5 گەكتاردى قۇرايدى. اتلەتتەر اۋىلى 5 مىڭ ادامدى قونىستان­دىرۋعا لايىقتاعان. تۇرعىن بولىكتىڭ جالپى كولەمى شامامەن 125 مىڭ شارشى مەتردى, 1748 پاتەردى قۇرايدى. ونىڭ قۇرىلىسىن قازاقستاندىق «ەليتستروي» كومپانياسى جۇرگىزگەن. مۇنداعى وتانداستار قامتىلۋى 60 پايىزدىق ۇلەسكە تەڭ. قۇرىلىس جۇرگىزۋدى اياقتاۋ تامىز ايىنىڭ سوڭىنا بەلگىلەنگەن. بىراق قۇرىلىسشىلار ونى 2 اي مەرزىم بۇرىن اياقتاپ شىقتى. تۇرعىن ءۇي كەشەنى U (Universiade) اعىلشىن ارپىمەن ورنالاسقان 14 عيماراتتان جانە قىزمەت كورسەتەتىن 3 بلوكتان تۇرادى. ساۋلەت جوسپارى بويىنشا بارلىق نىساندار جارتاسقا سالىنعان سۋرەتتەردەگى كۇن ادامىنىڭ بەينەسىن بەينەلەيدى. 14 قاباتتى تۇرعىن ءۇي عيماراتتارىنىڭ ورتاسىندا «پيرا­ميدا» دەپ اتالاتىن وپەراتسيالىق بلوك ورنا­لاسقان. وندا ۋنيۆەرسيادا كەزىندە FISU ۇيىم­داستىرۋشىلارىنىڭ كەڭسەسى, 1000 ادام­عا قىزمەت كورسەتۋگە ەسەپتەلگەن اسحانا جانە دەمالىس ورنى جايلاساتىن بولادى, ينتەر­بەل­سەندى تەحنولوگيالاردى قولدانۋ ارق­ى­لى ءداس­تۇرلى مۋزىكالىق اسپاپتار مۇرا­جايى ۇيىم­داستىرىلادى. تاماقتاندىرۋ بلوگى تاۋلىگىنە شامامەن 20 ساعات بويى جۇمىس ىستەيدى. ءدال وسى «پيراميدا» جاڭادان كەلگەن سپورتشىلار مەن دەلەگاتسيالار مۇشەلەرىنىڭ تۇسەتىن ورنىنا اينالادى. قاتىسۋشىلار كەرەكتى باعىتتارىن وڭاي تابۋ ءۇشىن عيما­راتتىڭ كىرەبەرىسىندە «كومپاس» اتتى الەمنىڭ گەوگرافيالىق باعىتتارىن كورسەتەتىن تاس ورناتىلادى. اككرەديتتەۋدەن وتكەننەن كەيىن سپورتشىلار كۇندەلىكتى تۇرۋعا قاجەتتى بار­لىق جاعدايلارى جاسالعان تۇرعىن ءۇي كورپۋستارىنا قونىس تەبەدى. بولمەلەر كىر جۋ ماشينالارى مەن تەلەديداردان باستاپ, شاش كەپتىرەتىن فەنگە دەيىن تولىق جابدىقتالعان. كەشەننىڭ ورتالىعىندا «كەزدەسۋ الاڭى» – «Welcome» اتتى سپورت الاڭى بار. ورتالىق الاڭنىڭ جان-جاعىندا قىزمەت كورسەتۋ بلوكتارى قانات جايعان. وندا ويىندار بارىسىندا اتلەتيكالىق اۋىل اكىمدىگى, عيبادات بولمەلەرى, دۇكەندەر, سۇلۋلىق سالوندارى جايعاسادى. قوناقتارعا قىزمەت كورسەتۋگە ارنالعان اكىمشىلىك-شارۋاشىلىق جانە باسقا دا ءۇي-جايلاردىڭ جالپى كولەمى 27,5 مىڭ شارشى مەتردى قۇرايدى. اتلەتيكالىق اۋىلدى جوسپارلاۋدا قونىستانۋشىلار ءۇشىن بارىنشا جايلىلىق پەن قولايلىلىق قاراستىرىلعان. مىسالى, تۇرعىن ءۇي كورپۋستارى ورتالىق الاڭنان تۇر­مىستىق بلوكتارمەن قورشالعان, عيمارات­تاردىڭ وزدەرى الاڭعا الدىڭعى جاعىمەن قارايدى. سول سەبەپتى «Welcome» الاڭىنداعى مەرەكەلىك اكتسيالار مەن شوۋ سپورتشىلاردىڭ دەمالۋىنا كەدەرگى كەلتىرمەيدى. سپورتشىلار, تورەشىلەر جانە دەلەگاتسيالار مۇشەلەرى ۋنيۆەرسيادا نىساندارىنا ارنايى اۆتوبۋستارمەن جەتكىزىلەدى. كەشەن ءۇاواج (ۇلكەن الماتىلىق ورامدى اۆتوجول) سولتۇستىك-شىعىس بولىگىنە شىعۋ مۇمكىندىگى بار, ۇلكەن تراسسالار قيى­لىسىنداعى قولايلى ورنالاسۋ ورنىنا يە. بۇل قاتىسۋشىلاردى جارىس ورىندارىنا جىلدام جانە جايلى جەتكىزۋگە مۇمكىندىك بەرەدى. اتلەتيكالىق اۋىلدى دۇنيەجۇزىلىك ستۋدەنتتىك ويىنداردان كەيىن پايدالانۋ اسا ماڭىزدى ماسەلە بولىپ تابىلادى. «ۋني­ۆەرسيادا مۇراسى» تاقىرىبى جوبالاۋ جانە قۇرىلىس سالۋ ساتىسىندا-اق پىسىقتالعان بولاتىن. سول ءۇشىن سپورتتىق قۇرىلىمدار ديرەكتسياسى ارنايى قۇرىلىپ, جۇمىس جاساۋدا. اتالعان ماسەلە تابىس­تى تۇردە شەشىمىن تاپتى. شىن مانىندە, اتلە­تيكالىق اۋىل ءبىرتۇتاس قالالىق تۇرعىن­دىق شاعىن اۋداننان تۇرادى. جوسپار بويىنشا, «ۋني­ۆەر­سيادا مۇراسى» باعدارلاماسىنىڭ شەڭبەرىندە اتلەتيكالىق اۋىل اۋماعىندا مىنا نىساندار ورنالاستىرىلادى: * پوليتسيا بەكىنىس پۋنكتى; * الاتاۋ اۋدانىنىڭ حقو; * وليمپيادالىق دايىندىق ورتالىعى; * بي ستۋدياسى, شاحمات, تەاتر جانە فوتو ستۋدياسىنىڭ فۋنكتسيالارىنان, ينتەر بەلسەندى كلۋبتان تۇراتىن, بالالار مەن جاستارعا ارنالعان دەمالىس ورتالىعى; * «بانكتسەنتركرەديت» ءبولىمى; * «Open Clinic» كلينيكاسى; * «Almaty sport city» فيتنەس-ورتالىعى; * «Best store» سۋپەرماركەتى; * «قازپوشتا» ءبولىمى; * تۇرمىستىق زاتتار ءۇيى; *«ديسكونت» فورماتىنداعى اتلەت-ورتالىق. اتلەتيكالىق اۋىلدى پايدالانۋعا بەرگەننەن كەيىن, الماتى قالاسىنىڭ الاتاۋ اۋدانىندا وزىندىك ينفراقۇرىلىمى بار جاڭا تۇرعىن شاعىن اۋدان پايدا بولادى. ءوز كەزەگىندە, اۋىلدىڭ قولايلى ورنالاسۋى جانە 12 مىڭ كورەرمەنگە ارنالعان مۇز سارايىنىڭ, «الاتاۋ» كينو-كونتسەرتتىك زالىنىڭ قاسىندا ورنالاسۋى قالانىڭ باسقا اۋداندارىنىڭ تۇرعىندارى مەن قازاقستاندىق مەگاپوليس قوناقتارىن وسى جەرگە تارتاتىن بولادى. تالعات رايىمبەك, «ەگەمەن قازاقستان»