جانبوتا الدابەرگەنوۆا: «ءوز ەلىمىزدە جاۋاپكەرشىلىك جوعارى بولۋى ءتيىس»

قىسقى ۋنيۆەرسيادادا شاڭعى اكروباتيكاسىنان ەل نا­مىسىن قورعايتىن قازاقستاننىڭ فريستايل قۇراماسىنىڭ كوش­باس­شىسى جانبوتا الدا­بەر­گەنوۆا بىزبەن كەز­دە­سۋىندە وسى جارىسقا دا­يىن­دىعى تۋرالى اڭگىمە­لەپ بەردى. − دايىندىعىمىز قىزۋ ءجۇرىپ جاتىر, شىمكەنتتە جاتتىقتىق. ەندى الماتى ارقىلى امەريكاعا ۇشىپ كەتەمىز. وندا الەم كۋبو­گى­نىڭ كەزەڭدەرىنە قاتىسامىز. جارىستار اياقتالعان سوڭ اقش-دا ءبىر اپتاداي جيىن­داردا بولامىز, كەيىن ۋنيۆەر­سياداعا قاتىسۋ ءۇشىن قازاقستانعا ورالامىز. − جانبوتا, كوڭىلىڭ كۇپتى بولار؟ قالاي دەسەك تە, قا­زاقستاننىڭ فريستايل كو­مان­داسىنىڭ كوشباسشىسى دەگەن جاۋاپكەرشىلىك تە بار. − قاتتى تولقىپ ءجۇرمىن, ويتكەنى, ءوز ەلىمدە ونەر كورسە­تەتىندىكتەن, جاۋاپكەرشىلىك تە كوبىرەك. وعان قوسا, قازاقستاندا وسىنداي اۋقىمدى ويىندارعا, قالىڭ جۇرتشىلىق الدىندا تۇڭعىش رەت ويىن كورسەتپەكپىن. 2011 جىلعى قىسقى ازيا ويىندارىندا مەندە ونداي تاجىريبە بولعان جوق, ويتكەنى, شاڭعى اكروباتيكاسىنا ازيادادان كەيىن كەلدىم. − ماۋسىم باستالعالى بەرى اۋا رايى قاتتى قۇبىلىپ تۇر؟ دايىندىق قالاي؟ − ماۋسىم باستالعاندا بىزدە بەلگىلى ءبىر قيىندىقتار تۋىندادى, فينلياندياداعى وقۋ-جاتتىعۋ جيىندارىندا تولىققاندى دايىندىقتان وتە المادىق. سۋومي جەرىندە جۇرگەنىمىزدە, اۋا رايى ءبىر جىلىپ, ءبىر سۋىپ, بۇرقاسىن كوتەرىلدى, سول سەبەپتەن كەيبىر جاتتىعۋلار وتكىزىلگەن جوق. سوندىقتان ءالى ءوزىمدى سەنىمدى سەزىنىپ جۇرگەن جوقپىن, الايدا, امەريكاداعى الەم كۋبوگى كەزەڭدەرىندە مۇنى مىندەتتى تۇردە ەڭسەرەمىن. − ۋنيۆەرسياداعا شاڭعى سپورتىنىڭ قانداي ساڭلاق­تا­رى كەلە جاتقانىنان حاباردار شىعارسىڭ؟ − قاتىسۋشىلاردىڭ ەسىم­دەرىن ءالى بىلمەيمىن, دەگەنمەن, باستى قارسىلاستارىمىز بۇرىنعىسىنشا قىتاي, رەسەي جانە بەلارۋس اتلەتتەرى عوي. − ۋنيۆەرسيادا الدىندا جا­ڭا ەلەمەنتتەردى قوساسىز با؟ − كەيبىر جاڭا ەلەمەنتتەرگە جاتتىعىپ ءجۇرمىن, الايدا, ۋنيۆەرسيادا كەزىندە ولاردى ورىندايمىن با, بىلمەيمىن. قۇ­لاپ قالعاننان گورى, كۇردەلى ەمەس سەكىرىستەردى تازا ورىنداپ شىققان دۇرىسىراق. سوندىقتان تەكسەرىلگەن, ابدەن ماشىقتانعان سەكىرىستەرگە ارتىقشىلىق بەرىلەدى, بىراق امەريكاداعى الەم كۋبوگىنان كەيىن عانا ونى ناقتى شەشەتىن بولامىز. − فريستايل – جۇرەكجۇتقان ونەردى تالاپ ەتەتىن سپورت ءتۇ­رى. قازاقستاندا قىسقى ۋني­­ۆەرسيادانىڭ ءوتۋى شاڭعى اكرو­باتيكاسىنا قىزىعاتىن جاس­تاردىڭ كوبەيۋىنە اسەر ەتە الا ما؟ − بۇل − وتە قاۋىپتى سپورت ءتۇرى. 5-6 مەتر بيىكتىككە سەكىرىپ, اۋادا اينالۋ اركىمنىڭ قولىنان كەلمەيدى. باتىلدىق, ءتوزىم كەرەك. ۋنيۆەرسيادادان كەيىن ءبىزدىڭ سپورت ءتۇرى تۋرالى ادامدار كوبىرەك بىلە باستايدى دەپ ۇمىتتەنەمىن. ويتكەنى, فريس­تايلمەن شۇعىلدانامىن دەگەندە, كوپشىلىك «بۇل, نە, بي مە؟» دەپ سۇرايدى. سوسىن تۇسىندىرۋگە تۋرا كەلەدى. مەملەكەتىمىز دە سپورتتىڭ وسى تۇرىنە كوڭىل بولە باستادى. فريستايل بويىنشا سەكتسيالارعا كەلەتىن بالالار سانى ارتسا, قىتايلىقتار سەكىلدى جوعارى باسەكە بولسا دەيمىن. شاڭعى اكروباتيكاسى فريستايل سپورت جارىستارى ىشىندەگى ەڭ ەكسترەمالدىسى سانالادى. سوندىقتان جانكۇيەرلەردىڭ بارلىعىن ونى ءوز كوزىمەن كورۋگە شاقىرامىن. اڭگىمەلەسكەن ايناش ەسالي, «ەگەمەن قازاقستان»  الماتى