ادامدار ومىرىنە تونگەن قاۋىپ سەيىلدى

قوستاناي وڭىرىندە كوكتەم شىققانشا «كارى قۇدا قىستىڭ» الەگى تاۋسىلمايدى-اق. قاراسۋ اۋدا­نىنداعى ۋشاكوۆ ەلدى مە­كەنى وبلىس ورتالىعىنان 200 شاقىرىمداي جەردە جاتىر. اۋىل نەگىزگى ۇلى جولدان 24 شاقى­رىمدا ورنالاسقان. جول مەن اۋىل­­دىڭ اراسىن قار كومىپ,  سىرت­قى ءدۇ­نيە­مەن بايلانىس ءۇزىلىپ قالعان بولاتىن. ايتەۋىر ۇيالى باي­لانىستىڭ ارقاسىندا اۋىل­دا­عىلار ورتالىقپەن حابارلاسىپ وتىردى. جاقىندا وسىنداعى اياعى اۋىر ايەلدىڭ دەنساۋلىعى ناشارلاپ, بۇكىل ۋشاكوۆتىقتار ءبىر تارىنىڭ قاۋىزىنا تىعىلعانداي بولدى. ءبىر-ەكى شاقىرىم ەمەس, باقانداي 24 شاقىرىمدى قارعا ومبىلاپ, ات تا, اربا دا ءجۇرىپ وتە المايدى. بۇل اۋىلعا تەك سولتۇستىك وڭىرلىك اەروۇتقىر جەدەل-قۇتقارۋ جاساعىنىڭ قۇتقارۋشىلارى عانا جۇردەك كولىگىمەن كىرە الدى. جەدەل دارىگەرلىك كومەك كورسەتىلمەسە, اياعى اۋىر انانىڭ جاعدايى تىم ناشارلاپ كەتەتىن ءتۇرى بار ەكەن. ونى قۇتقارۋشىلار  جولداعى اۋليەكول اۋداندىق اۋرۋحاناسىنا جەتكىزىپ سالدى. سول جولى اۋىل فەلدشەرى ءىشى اۋىراتىنىن ايتىپ, مازالانعان ون جاسار ەر بالانى دا قۇتقارۋشىلارعا ايتقان بولاتىن. فەلدشەر سوقىر ىشەك بولۋى مۇمكىن دەپ دياگنوز قويعان بالانى قۇتقارۋشىلار قوستاناي قالاسىنداعى وبلىستىق بالالار اۋرۋحاناسىنا اكەلىپ تاپسىردى. ولار قار قۇرساۋىنداعى اۋىلدان تاعى دا 8 ادامدى الىپ شىقتى. ادامدار ءومىرى مەن دەنساۋلىعىنا تونگەن قاۋىپ سەيىلدى. – 24 شاقىرىم – وتە ۇزاق جول. شامالى قار ءۇرىپ جاۋسا جولدى كومىپ تاستايدى. ونى ءار قار جاۋعان سايىن تازالاپ وتىرۋ وڭاي ەمەس, كوپ قارجىنى تالاپ ەتەدى. سوندىقتان ۋشاكوۆ اۋىلىنىڭ جاعدايى ۇنەمى قۇتقارۋشىلار نازارىندا بولادى, – دەيدى سواۇجقج باستىعىنىڭ ورىنباسارى سەرگەي شميدت. قۇتقارۋشىلار مۇنىڭ سىرتىندا وبلىس وڭىرىنەن وتەتىن رەسپۋبليكالىق ماڭىزى بار تاس جولداردىڭ بويىندا كەزەكشىلىك جاساپ, قارعا كەپتەلىپ قالعان جولاۋشى كولىكتەرى مەن ادامداردى ءۇسىپ كەتۋدەن ساقتاپ قالدى. ءنازيرا جارىمبەتوۆا, «ەگەمەن قازاقستان» قوستاناي